Agartala, Nailur:
Ka seng Communist Party of India (Marxist) ha Tripura ka la phah shithi sha u Chief Electoral Officer (CEO), u Puneet Agarwal, ha kaba la kyrpad na ka bynta ban pynïoh ïa ka jingshngaiñ ha kaba ïadei bad ka jingdon jong ka ilekshon shiteng samoi ha 20-Boxanagar bad 23-Dhanpur Assembly konstitwensi.
Ha kaba ïadei bad kane, ka kynhun nongmihkhmat jong ka seng CPIM, kaba kynthup ïa ki lai ngut ki nongïalam ba pawkhmat kiba kynthup ïa u MLA jong ka CPIM u Jitendra Chaudhury, u Myntri barim u Manik Dey, bad u nongïalam jong ka seng CPIM u Haripada Das, ki la pynlong ka jingïakynduhlang bad u CEO jong ka Tripura, na ka bynta ban aiti ïa ka jingthoh halor ka jingbuh jingkyrpad.
“Naba ngi la ïohi ïa ki ilekshon shiteng samoi kaba hashwa ba la pynong ha u snem 2022 ha ki saw tylli ki Assembly konstitwensi, ngi la kwah ban buh ka jingkyrpad ha kaba ïadei bad ka jingpynïoh ïa ki rukom pyntreikam ki ban buh jingshngaiñ ha ka ilekshon khamtam ha kaba ïadei bad ka jingïaid beit ïaid ryntih khlem kino kino ki jingshah ktah ne shah pynthut”.
Kumba la ïathuh, la ong ba ha ka ilekshon shiteng samoi ba hashwa, khamtam ha 8-Town Bordowali Assembly konstitwensi, ka seng kaba bat ïa ka jingbishar ka BJP ka la ïasngewthuh jingmut bad ki pulit lyngba u DCP ha katei ka por u VS Jadav, ha kaba ki briew kiba nabar ba la pyntreikam da ka seng BJP ha ki thaiñ ba la pynlong ïa ka ilekshon da kaba suk ki la ïohlad ban leh ïa ki kam thombor pyrshah ïa ki nongthep vote.
Ki pulit ki la shah hukum ba ki briew kiba teh da ki ribbon rong stem ne lieh ha ki kti jong ki ne kiba don ki jingdeng khlieh kim dei ban shah ktah kti. Kine ki la ïohlad ban leh kumba la shah hukum. Ha kane ka rukom ka ilekshon shiteng samoi ha 8-Town Bordowali Assembly konstitwensi ka la shah ktah jur”, la ong ka shithi ba la phah da ka seng CPIM.
