Moscow, Nailur:
U ‘namding ‘RS-28 Sarmat’ uba long u Intercontinental Ballistic Missile (ICBM) jong ka Russia, ia uba ka thaiñ West ka ju tip da u ‘Satan II’, u dei ruh u ‘namding ba u President ka Russia- u Vladimir Putin ha ki por ba la leit u la ong ba u long u ‘namding uba shyrkhei haduh katta-katta. Ka tnat haw-haw Roscosmos ha ka Sngi Thohdieng ka la iathuh ba ka Russia ka la pyndonkam ia kitei ki ‘namding ha ka jing-iakhun bad kane ka long kaba ap jingma shibun ia ka Ukraine bad ia kiwei ruh ki ri lada ka Russia kan ther ‘dusmon da kitei ki jait ‘namding.
Ha katei ka sngi u heh ka Roscosmos, u Yuri Borisov u la pyntip ba ka Russia ka la sdang ban pyntreikam ia utei u jait ‘namding ‘Satan II’ ba shyrkhei.
La ong ba utei u ‘namding RS-28 Sarmat, u long u namding uba kyrpang tam jong ka Russia ha kane ka juk ba mynta bad la ong ruh ba u lah ban long u budlum jong ka Russia ha ki por ka jingiakhun thma pyrshah ia ki nongshun jong ka. Une u ‘namding u long uba khlaiñ bor haduh katta bad uba lah ban kot ia ka jing jngai kaba kham jngai ban ia kiwei pat ki ‘namding ba ka Russia ka don bad u long ruh uwei na ki ‘namding ba shyrkhei tam ha ka pyrthei baroh kawei.
La ong ba u RS-28 Sarmat, uba la ai kyrteng da u ‘Satan II’, u long u ‘namding ba ka Russia ka la pynmih ha u snem 2018, kaba kynthup ruh ia ki ‘namding Kinzhal bad Avangard.
Une u ‘namding, u don kumba 200 ton ka jingkhia bad u dei ruh u ‘namding ba la shna kyrpang uba lah ban ialeh pyrshah ia ki ‘Anti-missile Defence Systems’ bad kham ñiar ba kin don ki jait tiar kiba lah ban tehlakam ia u.
Katkum ka jingiakren ha ki khyndiat bnai ba la leit jong une hi u snem 2023, u heh ka tnat ‘Defence Committee’ jong ka Russia, u Aleksey Zhuravlyov u la pyndonkam ia ka kyrteng jong une u ‘namding kum ka jingmaham bad jing byrngem ba ka Russia ka pyn-ap ban pynhiar kput ia ki nongshun jongka.
Ia kane, u Zhuravlyov u la kren hapdeng ka jingshim ‘Interview’ ha u Jymmang haba iadei bad ka jingsngew jong ka Russia halor ka jingthmu ban pynrung ia ka Sweden bad Finland hapoh jong ka kynhun NATO wat hapdeng ka jingiakhun thma jong ka Russia bad Ukraine ha kine ki snem mynta.
Kumta, la ong ba ka Finland ka la ioh ban pyniasoh noh ialade sha ka kynhun NATO tang hadien khyndiat taiew ba la pynbna ia katei ka khubor hi, katba ka Sweden pat ka dang pyn-ap ban ioh ia ka jingmynjur na kiwei pat ki ri bad ki bor ba halor jong ka NATO.
Dei ha katei ka por, ba u Zhuravlyov u la ong ba ka Russia ka lah ban pyllait ia kitei ki ‘namding ‘Satan II’ ha ka ban pynhiar kput ia kitei ki ri jong ka NATO bad khamtam ia ka United Kingdom bad ka United States, kiba long ki ri kiba u Putin u kynnoh ba ki long ki ri kiba kham don bor bad kiba ialam ia katei ka kynhun NATO.
