Imphal, Nailur:
Ka kynhun CBI ka la shimti ban pynlong ïa ka jingtohkit ha kaba ïadei bad 27 tylli ki jingujor ejahar ba la buh ha kaba ïadei bad ki jingïakynad bajur ha Manipur ha kaba la pynshisha ba ka la shim ïa ka jingim jong palat 160 ngut ki briew kaba la neh lajan saw bnai mynta, la ïathuh ki heh pulit.
Katkum ka jingbuh jingkheiñ, la ong ba ka kynhun Central Bureau of Investigation (CBI) haduh mynta ka la shah pynkhamti bad tohkit ïa 27 tylli ki jingmudui da ki pulit ka jylla, ha kaba 19 ki jingjia ki dei halor ki jingshah thombor jong ki kynthei, lai tylli kiba ïadei bad ki kam lute da ka kynhun jong u paidbhur, ar tylli halor ka kam pynïap briew bad mar kawei ha ka jingleh donbor, pynïap briew, rahbor bad kiwei pat ki kam sniew kiba ïadei bad ka jingïasuhbuit ban nang pynjur ïa ka jingïakynad, la ïathuh ka tyllong khubor.
Kane ka kynhun tohkti, ka la buh shuh shuh ïa ka jingmudui ha kaba ïadei bad kine ki jingjia hynrei kam shym la pynpaw paidbah namar ki jinglong jingman kumba ka long ha ka jylla, la ong ki heh jong ka kynhun.
Ki kynhun CBI ki la sdang ban kylli jingkylli ïa ki briew kiba la shah suba bad ïa ki lanot hadien ka jingleit jurip bniah jong ki sha ki jaka ba la jia ki jingïakynad, la bynrap shuh shuh ka tyllong khubor.
