Jowai, Nailur 03
Ka lympung ïalehkai phutbol ba la tip kum ka (L) Kesilroy Pala Invitation Football Knock-Out Tournament 2023, ïa kaba la pynïaid da ka West Jaiñtia District Sports Association (WJDSA) ka la sdang ha madan Kiang Nangbah Stadium, Ladthadlaboh Jowai ha ka sngi Saitjaiñ.
ïa kane ka lympung ïalehkai la wan ban plie pyrda da u khun jong u (L) Kesilroy Pala, u Bah Ngaitlang Dhar uba dei ruh u MLA barim ka Umroi Constituency ha ka jingïadonlang kiba haïing hasem, u MLA ka Jowai u Bah Wailadmiki Shylla, u Myntri barim ka Jylla u Bah Dasakhiat Lamare bad ki nongshah khot sngewbha.
Hashwa ba ki ar kynhun kin hiar sha madan, ka la don ka jingïalang lyngkot ba la pynïaid da u Vice President jong ka WJDSA u Bah Patrick Lamare bad la ïoh ka jingkren lyngkot na u Working President u Bah EMH Passah bad na u General Secretary u Bah Lammat-o-Laloo.
U Bah Ngaitlang Dhar ha ka jingkren u la ong ba ka jingthrang jong ki kum ka ïing ban pynmih ïa kane ka lympung ïalehkai ha ka kyrteng jong u Kpa jong ki, ka long namar ba u Kpa jong ki, u dei u briew uba ieid bad sngewtynnad ïa ka kam ïalehkai.
Ha kane ka lympung la wan ban ïashim bynta da ki 17 tylli ki kynhun na ki ar tylli ki District jong ka rilum Jaintia.
Ha ka sngi sdang jong ka lympung, ka jingïakhun ka la long hapdeng ka Mukhla Football Club pyrshah ïa ka Mupliang Football Club. Ka jingïakhun hapdeng kine ki ar liang mamla ka la long kaba kham noh shiliang, bad ha kaba kut ka Mukhla FC ka la lah ban pynliem noh da 6-1 kol ïa ka Mupliang FC.
Ïa ki kol jong ka Mukhla FC la ïoh ban thep da u Wadajied Ryngkhlem ha ka minit kaba 23 bad 64, u Santi Janai ha ka minit ba 68, u Timmy Ryngkhlem ha ka minit ba 79, u Teddy Bang ha ka minit ba 82 bad u Player Suna ha ka minit kaba 85. Katba ïa ka shi kol jong ka Mupliang FC la ïoh ban thep da u Basuk Khonglah ha ka minit 45+2.
Ha kane ka lympung ïalehkai, ka khusnam kaba la pynkhreh na ka bynta ka kynhun ka ban ïohrah ïa ka nam lahduh, ka long T.5 lak katba ka kynhun ba shah rem noh ha ka final kan khur T.2 lak ryngkat ki syrnod bad trophy.
Ka jingïakhun ban wan, kata ha ka 6 tarik mynta u bnai kan long hapdeng ka Ladthadlaboh Sports Club pyrshah ïa ka Mukhla Football Club ha ka por 2.00 baje nohphai sngi.
