Ohio, Nailur:
Ka tnat pulit jong ka Ohio ha ka Sngi Saitjaiñ ka la pyllait ia kawei ka video ba la ioh ring haba iadei bad ka jingjia shah siat iap jong ka briew 21 snem kaba dang armet, kaba la ithuh kyrteng kum ka Ta’kiya Young, ha kaba ki pulit ki la siat ia ka hadien ba ka la shah kynnoh tuh na kawei ka dukan hapoh Columbus ha ka taiew ba la lah.
Ha katei ka video la iohi ia u heh pulit ka Blendon Township, uba la leit tur sha ka liang ba ka Ta’kiya Young ka shong ha kawei ka kali kaba la pynieng habar jong ka Kroger Grocery Shop hapoh Westerville, jong ka nongbah Ohio bad la iohi ruh ia utei u heh pulit ba u la pynbor bad hylla ia ka, ba ka dei ban mih napoh ka kali ban pyndem ialade hakhmat ki pulit bad ki trai jong ka dukan. Kumjuh ruh sa uwei pat u heh pulit uba ar, u la leit sha katei ka kali ba ka shong bad bthah ia ka ba kan hiar na katei ka kali bad ban pyndem ialade.
Kitei ki heh pulit ki la ong ba, kumba la ïohsngew ia ka jingkynnoh, la tip ba katei ka briew ka la tuh eiei na katei ka dukan bad kumta ki la bthah ia ka ba kan hiar na kali, ban phla ia ka jingshisha bad ban leh ia kaba donkam baroh.
Hynrei, la ïohsngew ruh ia katei ka samla ba ka ong, ba kam shym la tuh eiei. Ki pulit ki la iathuh ba ki don ki nongtrei na katei ka dukan kiba ujor bad iathuh ba kawei ka briew kaba la tuh ia katto katne bilor ka kyiad na katei ka dukan, ka don habar jong katei hi ka dukan hapoh jong kawei ka kali kaba pynieng ha phyllaw. Shuh shuh ruh lyngba jong katei ka video, la ïohsngew ia ka Young ba ka kylli hato ki nud ban siat ia ka wat lada ka shah kynnoh kumtei.
Dei ha mar katei ka por ba la iohi ia katei ka samla ba ka pyrshang ban pynphai bha ia ka kali kumba kan mih noh na katei ka jaka, ha kaba uwei na kitei ki heh pulit u la hylla bad bthah shi bthah ia ka ba kan mih napoh ka kali.
Tang kumba katto katne sekons, la iohi pat ia uwei u heh pulit uba ïeng hakhmat ka kali jongka, uba la sei ia ka suloi bad siat ia ka markhmat.
Hadien ba u la dep siat, utei u heh pulit u la kynhied iaka ba kan sangeh ia ka kali hynrei katei ka briew ka la ialeh ban phet na katei ka jaka bad kumta ka la ioh kum tynrah bakla ia ka kynroh jong kawei ka ïingmala kaba don ha katei ka jaka.
Hadien kata, utei u heh pulit u la khot ia ki briew ban iarap bad ki la ia pynpait ia ka iit jong katei ka kali ban ioh ban sei ia katei ka briew ka bym tip briew shuh ha katei ka por.
Na ka liang ki bahaiing- hasem jong ka Young, ki la ong ba kane ka long ka jing pyndonkam bakla jong ki pulit ia ka bor bad ki la iathuh ruh ba ka Young ka dang don tang 21 snem bad ka dang pun khun ruh ha kane ka por.
