Seoul, Nailur:
Katkum ki khubor, la ong ba ka North Korea ha ka step phyrngab jong ka Sngi Saitjaiñ ka la ther ‘namding biang sha ki bynta jong ka duriaw ‘West Coast’.
Ki kynhun syntiat jong ka US bad South Korea ki dang wad bniah ban lap ia ki jingtip ba bniah haba iadei bad ka jaka ba la pynher ia utei u ‘namding ha katei ka step.
Namar kumba la tip ba ka North Korea ka la ther ‘namding khah-khah hapdeng ka jing-kilan jong ki shipai ka United States bad ka South Korea naduh ki bnai ba la leit bad wat haduh kine ki sngi ruh ka North Korea kam shym la sangeh satia.
Ha ka Sngi Palei, la ioh jingtip ba ka North Korea ka la thmu ban ther ‘namding sha ki bynta khappud jong ka South Korea.
Haba iadei bad kane, ka South Korea ha ka Sngi Thohdieng, ka la pynngat kyndon ia 5 ngut ki heh nongkhaïi shimet jong ka North Korea bad kumjuh ruh ia kwei ka kompeni jong ka North Korea halor ki jingleh bym suitñiew jong katei ka ri haba iadei bad ki jingmaham jong ka South Korea bad ka US ban sangeh noh ia ka jingpynher ‘namding ba khah-khah namar ka long ka jingma kaba khraw ia kitei ki para ri ba marjan.
