Los Angeles:
U Tony Leung uba la pawnam bad paw pyrthei ha ka kam ba u trei bad uba la shim bynta ruh ha ki phlim kum ka In the Mood for Love bad kiwei kiwei ula shah pynkup burom da ka Lifetime Award ha ka Venice Film Festival ha kaba ka jingshah pynkup buron une u tyngshop da kawei na ki khusnam bakhraw ka la pynjaw ummat ia u naba um shim poi pyrkhat ne khmih lynti ia kaba kum kane kaei kaei.
Une u tyngshop uba na Hong Kong ha ka sngi saitjaiñ ula shah pynkup burom da ka Golden Lion Lifetime Achievement Award ha kaba ha ka por ba ula leit ban pdiang ia kane ka khusnam ula jaw ummat kum ka dak jong ka jingsngewnguh bad ha kajuh ka por jing sngewkmen ha kaba iadei bad kane.
Shuh shuh ha ka por ba u Leung ula leit pdiang ia katei ka khusnam ka la don ka jingieng lang na baroh kum ka dak jong ka jingai burom ia une u tyngshop halor ka kam ba u trei.
Ha ki snem ba la leit u Leung ula wan shim bynta ha kane ka tamasa bad kane ka dei ruh na ka bynta ban pynbna ia ki phlim ba u ak ka A City of Sadness (1989), Cyclo (1995) bad Lust, Caution (2007) kaba direk da u Ang Lee.
U Leung uba la 61 ula wanrah nam bad burom ia ka Hong Kong da ka jingiohpdiang jong u ia katei ka khusnam bad sngew ba kane ka khusnam ka pyni ia ka dak jong ka jingtrei shitom bad jingnoh synñiang jong u ha kaba iadei bad ka kam ak phlim.
