Washington, Nailur:
Katei ka briew 25 snem ka rta na United States ka la shah bat noh ha ka Sngi U Blei, hadien ba ka la kum ioh siat bakla ia kawei ka khyllung 4 snem katba ka dang pyni nuksa ia ka halor ka rukom pyndonkam ia ka suloi.
Ka tnat Tennessee Bureau of Investigation (TBI), ha ka Sngi U Blei ka la pynithuh ia katei ka briew kaba la tip kyrteng ka Breanna Runions bad kaba la shah pynngat noh hapoh jong ki kyndon pynkheiñ aiñ kiba iadei bad ka jingleh pynkheiñ aiñ bad ka jingpynmynsaw bad jingpyniap.
Ia katei ka khyllung la tip kyrteng ka Evangeline Gunter bad ka dang don 4 snem ka rta bad ka long ka khun jong ka Josie Gunter, kaba long ka paralok jong ka Runions bad kaba ki iasah lang ha katei kajuh ka iing.
Hapdeng ka jingtohkit, ki bor pyniaid ki la iathuh ba ka jingsiat jong ka Runions ha katei ka jingjia, ka la pynlong ia katei ka khynnah rit ba kan duh noh syndon la ka jingim namar ka jingleit dei jong u kuli na ka bynta kaba pynduh mynsiem kloi ia ka.
Watla ka Runions bad ka Josie ki la ialeh katba lah ban pynkloi ban pynpoi noh ia katei ka khyllung sha ka jaka sumar, hynrei ki bor pyniaid jong katei ka hospital Roane Medical Center ki la pyntip ba katei ka khyllung ka la khlad noh tang mar ia poi ha katei ka jaka sumar bad na ka liang ki doktor kim lah shuh ban iarap ne pynneh mynsiem ia ka.
La ong ba ka daw jong katei ka jingjia ka long namar ba Runions ka sngew bitar ia kitei ki khyllung ba kim leit kyrsiew ia ka Josie kumba ka bthah. Kumta ka la khot ia katei ka khyllung 4 snem bad ka la phah shim ia ka suloi na ka jaka buh bad hadien kata, ka la bthah ia katei ka khynnah ban pyni kumno ban pyndonkam ia ka suloi bad dei ha katei ka por ba ka Runions ka la knieh ia katei ka suloi bad ka la pyni ia katei ka khyllung kumno ban bat bad ban pyndonkam ha kaba ka la thew na ki bynta ka shadem jong katei ka khyllung bad ioh kum bakla siat ha mar katei ka por.
Shuh shuh ruh la ong ba ka Runions bad ka Josie ki don jingiadei kum ki shijur bad kumta katei ka kmie jong kitei ki khyllung ka la iathuh ba kitei ki khyllung ki dei ban sah lang badka ha katei ka iing sa tang kumba katto katne bnai. Kumta, ka la pynpaw ruh ia ka jingsngew babe ba ka pynsah lang ia kitei ki khyllung ha iing namar kam lah ruh ban tip ioh lehse katei ka paralok jongka, kam sngewtynnad ia kitei ki khunrit jongka bad ioh dei kane ka daw kaba pynlong ia ka ban siat ia katei ka khyllung 4 snem.
