Kyiv, Nailur:
U President ka Ukraine, u Volodymyr Zelensky ha ka Sngi U Blei u la pynbna halor ka jingkhlad noh jong u Myntri ka tnat iada jong ka Ukraine- u Oleksiy Reznikov bad kumta ruh u la pynbna ba ka Ukraine ka donkam ban thung nongialam noh da uwei ha ka jaka jong utei u nongialam ba la khlad.
Kane ka jingpynbna na ka Ukraine, ka long ruh ha kajuh ka por katba ka Ukraine ka dang iakhun pyrshah ia ka jingleit thombor ki drone ka Russia ha ki bynta South jong ka thaiñ Odesa ha ka step jong ka Sngi U Blei.
U Oleksiy Reznikov u la iadon bynta kumba 550 sngi hapdeng ka jingiakhun thma jong ka Ukraine pyrshah ia ka Russia ha kine ki sngi.
Kumta, u Zelensky u la pynbna ruh ba yn thung bujli noh da u Rustem Umerov, uba la ju long u khlieh jong ka tnat State Property Fund naduh u snem ba la leit.
Ka Ukraine ka la pyntip ruh ba ka Russia ka la phah thombor da ki drone kiba ka ioh na ka Iran bad kiba la leit ban thombor ia ka thaiñ Odesa ha kane ka por.
