Shillong, Nailur 05
Ka lympung ïaleh-kai Indian Super League kan sdang naduh 21 tarik mynta u bnai ha kaba ka Kerala Blas-ters kan ïakhun nyng -kong pyrshah ïa ka Bengaluru FC ha Jawaharlal Nehru Stadium, Kochi.
Kat kum ki khubor la ong ba ïa kane ka lympung bad kumjuh ïa ka prokram ïalehkai jong ka ISL yn sa pyllait mynta ka taïew.
“Ïa mynta ngin ym pat ïoh ïa ka prokram ïalehkai ba pura, hynrei ka KBFC bad ka BFC kin sdang ban ïalehkai nyngkong bad kan dei ka jingïalehkai kaba nyngkong eh ha la ïing na ka bynta ka Kerala,” la ïathuh ki khubor.
Kane ka lympung ïalehkai ka dei kaba shiphew, ha kaba mynta ka aïom yn ïohi ïa ka klob I-League kaba la kiew kyrdan sha kane ka lympung. Ka Punjab FC (ïa kaba la tip kham hashwa da ka RoundGlass Pun-jab), ka la khur ïa ka nam lahduh ha ka I-league jong ka aïom ïalehkai ba la dep, bad namar kata ka la ïoh rung sha ka ISL napdeng ki 12 tylli klob kiba la ïashim bynta.
Kane ka jingïalehkai kaba nyngkong ka lah ban long kaba kham itynnad namar ka jingïakhun kitei ki ar ki kynhun ka la mih ki kynrum kynram ha ka ‘playoff’ jong ka aïom ba la lah ha Kanteerava stadium kaba ha Bengaluru.
U kapten ka BFC u Sunil Chhetri u la ïoh ban thep kol lyngba ka free-kick ha ka extra-time, ha kaba ki rangïalehkai ka Blasters kim shym pat shym la poi pyrkhat bad kane ka la pynkyndit khamtam ïa u coach u Ivan Vukomanovic.
Katei ka kol ka la pynlong ka BFC ban khur ïa ka jingjop hadien ba ki rangïalehkai ka Blasters ki la mih noh madan lem bad u coach.
Ha u Ïaïong mynta u snem, na ka liang ka disciplinary committee jong ka All India Football Federa-tion ka la pynshitom ïa katei ka klob lem bad u coach uba na Serbia (Vukomanovic) uba la shah sospon haduh 10 tylli ki jingïalehkai lem bad ka kuna kaba 5 lak tyngka.
Naduh ba ka la shah pynshitom, ka Kerala Blasters kaba la ïalehkai lai sien ha ka Super Cup bad kumjuh ha ka Durand Cup, bad u Vukomanovic un hap ban ap sa saw sien ki jingïakhun khnang ba u lah ban wanphai na ka bynta ban shimti biang ïa katei ka kynhun.
Ha kawei pat ka liang ka Bengaluru FC ka la khmih lynti ban ïalehkai bha ha kaba sdang ïa ka Indian Super League.
Ka BFC kaba long ka lahduh ha ka Durand Cup jong u snem ba la lah, kan mih madan ryngkat ka kynhun (reserve squad) hapoh ka jingïalam u coach u Bibiano Fernandes bad yn ïohi ïa u Simon Grayson ban un sdang ïa ka jingïalehkai na ka kynhun (senior) ha ka ISL mynta ka aïom.
