Madrid, Nailur:
Katkum ki khubor la iathuh ba 2 ngut ki briew ki la jah rngai ha ka Sngi Nyngkong hadien u ‘lapbah ba jur uba la ther ia ka nongbah jong ka Spain bad kaba la wanrah ia ki jingshlei um bad ba la hap ban khang khyrdep noh ia ka ‘Madrid Metro Lines’ bad ki rel bapher bapher ha katei ka sngi.
Katei ka ‘eriong ka la ktah la jan baroh kawei ka ri, ha kaba u slap uba jur tam u la ther ia bun tylli ki nongbah jong kane ka ri ha ki bynta rud duriaw jong ka Cadiz, Tarragona bad Castello.
Ha katei ka sngi la ong ba 2 ngut ki briew ki la khlad na katei ka ‘eriong kaba leit lynshop ia ka Toledo, la pyntip ki bor pyniaid jong ka Castilla La Mancha.
Ki lad pathai khubor jong ka Spain ki pyntip ba ia uwei na kitei kiba khlad la lap da ki pulit bad ka kynhun iarap na ka surok hajan jong ka shnong Bargas. Katba ia uwei pat la ioh tam da ka tnat iarap katba ka dang pyrshang ban wad ia u hapoh jong ka shnong Casarrubios del Monte ha katei ka sngi.
Namar la ong ba ka tnat iarap ha katei ka Lah Sngi U Blei, ka dang pyrshang ban wad ia uwei u briew ba la ioh jingtip ba u la jah rngai lang hadien ba ka kali ba u shong ka la shah rah ha katei ka jingshlei um hapoh Aldea del Fresno, kaba don sha ka thaiñ West jong ka Madrid.
Kumjuh ruh ka tnat pynlip ding ka la lap ia u khun ba 10 snem jong utei u briew, uba don lang bad u hapoh ka kali ha ka por ba katei ka um ka rah ia ka kali ba ki shong bad la lap ia utei u khun najrong jong u dieng hadien ba ka um ka la hiar.
Ka tnat iarap ka la ioh ban pyllait im hashwa ia ka kmie bad ka hynmen jong utei u khynnah bad kumta ki dang ialeh ban pynpoi ia u sha ka jaka ba kitei ki bahaiing- hasem jong u ki don.
Ha katei ka Sngi U Blei, ki paidbah nongshong shnong jong ka Madrid ki la ioh ia ka jingmaham na ka tnat ‘Emergency’ naduh ka step phyrngap jong ka Lah Sngi U Blei hashwa ba katei ka ‘eriong bad u ‘lapbah kin leit lynshop ia katei ka nongbah.
Ha katei ka sngi, wat ia ki jingïalehkai phutbol ruh kiba la pynbeit ban iakhun hapdeng ka Atletico Madrid bad ka Sevilla ruh la pynsangeh noh shwa namar ka jingma jong kitei ki bor ka mariang kiba wan lynshop ia katei ka nongbah.
Kumjuh ruh ki bor pyniaid rel ki la pynsangeh noh ia ki rel kiba stet ‘High Speed Rel’ ha katei ka sngi namar ka jingma kaba ap ia ki paidbah nongleit- nongwan lada ym lah ban phikir hashwa ba kitei ki bor ka mariang kin wan lynshop.
