Guwahati, Nailur:
Ki pulit jong ka Railway Protection Force (RPF) of N.F. Railway ki la pynlong ïa ka jingleit khmih bniah ha kiba bun ki bynta bad pynlong ruh ïa ka jingpyntreikam hapdeng ka 29 tarik, Nailar bad ka 31 tarik, Nailar, 2023. Ha kane ka jingpyntreikam la ïoh ban kem ïa 11 ngut ki briew ha kaba la pynshisha ba ki la donkti ban tuh ïa ki tiar ki tar jong ki nongleit jingleit.
Ha ka por ba la pynlong ïa ka jingpyntreikam, ha kiba bun ki jaka sangeh rel bad ha ki rel, ki pulit jong ka RPF ki la ïoh ban kurup ïa ki tiar kiba la kot sha ka T. 1,74,600 na ki jaka sangeh rel kiba don ha Katihar, Lumding, New Haflong, bad Guwahati.
Ha ka 29 tarik, Nailar, ka jingjia kaba la pynsah kynmaw kaba la jia haba ka kynhun Crime Prevention & Detection Squad (CPDS) jong ki pulit ka RPF ha Katihar, ha ryngkat ka jingïatreilang bad ka kynhun GRP/Katihar, ki la pynlong ïa ka jingleit thwet kaba ju long man ka sngi ha ka jaka sangeh rel ha Katihar.
Kane ka kynhun ka la ïoh ban kem ïa lai ngut ki briew bad da ka jingjop la ïoh ban kurup ïa lai tylli ki Mobile Phone ba la tuh na ki nongleit jingleit, ha kaba la antad ba kine ki la long ha ka dor kaba T. 32,000.
Ïa kine kiba la shahkem bad ïa ki Mobile ba la ïoh ban kurup la aiti sha u Officer in Charge of GRP/Katihar na ka bynta ban bteng ïa ka jingtohkit, la ïathuh ka jingthoh ba la wan na ka kynhun NFR.
Shuh shuh la ong, ba ha ka 31 tarik, u Nailar, ka kynhun RPF ha Guwahati ka la leit ban khmih bniah ïa ka jaka sangeh rel ha Guwahati.
Kumba la ïathuh la ong ba uwei u briew u la shahkem ha kane ka jingjia bad haba la khmih bniah ïa u la ïoh ban kurup ïa ka pla kaba don uwei u kynjri ksiar, kawei ka sohshkor kaba da ka ksiar, kawei ka Mobile Phone bad kiwei pat ki tiar, ha kaba haba la kheiñ kyllum, la ong ba kine ki la kot sha ka T. 60,600/-. Kine ki tiar ki dei kiba la tuh na ki nongleit jinglei ha ka rel No. 13175 (Sealdah – Silchar) Kanchanjungha Express.
Ka kynhun RPF ka la aiti ïa kine ki tiar ba la ïoh ban kurup bad ïa uba la shah suba sha u Officer in Charge of GRP/Guwahati na ka bynta ban leh ïa kaba donkam. Shuh shuh la ïathuh ba kum shi bynta ban ai jingshnaiñ ïa ki nongleit jingleit, ki pulit jong ka RPF ki la pynbiang ka jingïarap sha kiba pyndonkam da ki rel.
Ki nongleit jingleit ki lah ban pan jingïarap da kaba ñion ïa u number 139 (Toll-free) lada jia ba ki donkam jingïarap ha kaba ïadei bad kino kino ki jingeh ba ki ïakynduh ha ka por ba ki leit jingleit da ki rel.
