Georgia, Nailur:
Uwei khynnah 17 snem u la shah siat ha ki heh pulit hadien ba u la siat kuli bad pyniap ia uwei u ksew pulit bad thew ruh da kajuh ka suloi sha ki heh pulit jong ka Georgia kiba ia don ha katei ka por. Ka tnat pulit jong ka Clayton County ka la pynithuh ia utei u khynnah kum u Stephon Ford.
Hapdeng ka jingiakren bad ki lad pathai khubor, u Assistant Chief jong ka Clayton County Police Department, u Bruce Parks u la iathuh ba katei ka jingsiat ka la jia hapoh ka thaiñ Jonesboro jong ka nongbah Georgia, kumba 17 Mile na ka phang South jong ka Atlanta bad ka la jia ha ka por kumba 2 baje noh phai sngi.
Katkum ki khubor, la ong ba ki pulit jong ka Jonesboro ki dang leit ban thwet bad khynra ia ki jaka sah jong ki 3 ngut ki runar ha kawei ka ‘hotel’, ha kaba kitei ki 3 ngut ki la phet krad na ka kti ki pulit ha katei ka sngi bad 2 ngut ki la shah bat noh tang hadien katto-katne por.
Hynrei ha ka por ba ki poi ha katei ka jaka ba bun dieng, kynsan utei u khynnah u la sei ia ka suloi bad siat kulmar sha ka kynhun pulit, ha kaba katei ka jingsiat jong u ka leit dei ia utei u ksew pulit uba la iap noh hapdeng ka jingsumar hapoh ka hospital ba la leit rah ia u.
Hadien kata, la ong ba utei u khynnah uba long u suba don kti lang bad kitei ki 2 ngut ba la ioh kem, u la rah ia ka suloi bad thew sha ki pulit bad dei ha kane ka por ba ki pulit ki la siat kylla sha ka jaka ba don utei u khynnah bad u la kyllon iap noh syndon hangta.
