Khliehriat, Nailur 05
Ka Pamrakmai SC ka la jam sha ka semi final jong ka lympung ïalehkai 2nd Division Football League, katba ka SWO Moosianglamare Old bad ka Lakadong Ummat SC ki la rung sha ka quarter final jong ka lympung ïalehkai 3rd Division Football League.
Ïa kane ki lympung la pynïaid da ka East Jaiñtia Hills District Football Association (EJHDFA) ha madan Artificial Turf kaba don ha Diengshyrum, East Jaiñtia Hills District ha ka sngi Ba-ar.
Ha ka jingïakhun pre-quarter final jong ka 3rd Division, ka SWO Moosianglamare Old ka la jop da 3-1 kol ïa ka Ryntihlang SC Brichyrnot.
Ïa ki kol jong ka Moosianglamare Old la thep da u Samkhih Rymbai kaba la wan lyngba ka penalty ha ka minit kaba 58, u Meshwa Lapasam ha ka minit kaba 69 bad u Deilang Syrti (81). Katba ka shi kol jong ka Brichyrnot la thep da u Guiding War (27).
Ha ka jingïakhun kaba bud, ka Lakadong Ummat ka la jop da 3-0 kol ïa ka Lama Youth SSC bad ïa kine ki kol jong ka Lakadong Ummat la thep da u Pormi Sumer ha ka minit kaba 37, u Pynbha Suchen ha ka minit kaba 49 bad u Ebormi Lyngdoh ha ka minit kaba 71.
Ha ka jingïakhun quarter final jong ka lympung ïalehkai 2nd Division Football League, ka Pamrakmai SC ka la jop da 4-0 kol ïa ka Ïapmala UTD SC.
Ïa ki kol jong ka Pamrakmai SC la thep da u Nirmal Dkhar ha ka minit kaba 2, u Fivestar Shylla ha ka minit kaba 63&74 bad u Wat-o-Rymbai (78).
