Washington, Nailur:
Ka United States ha ka Sngi Balang, ka la pynbna ba la rai set patok haduh 22 snem ia u Enrique Tarrio, uba long u nongialam barim ka kynhun runar ‘Proud Boys’ kaba la don kti ha ka jingjia thombor ha ka 6 tarik u Kyllalyngkot jong u snem 2021 hapoh ka nongbah ha United States. Namar la ong ba u Tarrio u long u nongialam bad nongsuh buit ba hakhlieh duh jong katei ka kynhun runar.
La ong ba ki bor ka aiñ ki la rai ban pynjlan shuh shuh ia ka por set patok jong utei u nongialam haduh 33 snem kynthih. Watla u Tarrio um shym don ha Washington ha katei ka 6 tarik u Kyllalyngkot bad katei ka jingjia ka la jia, hynrei la ong ba baroh kitei ki kam ki long katkum ka jingbthah bad jingsuh buit jong u.
U Tarrio u la don 39 snem ka rta bad ha u Jymmang, la pynngat kyndon noh ia u, ryngkat bad kiwei de ki dkhot jong katei ka kynhun ‘Proud Boys’ namar ka jingiadon kti jongki ha katei ka jingjia ha u snem 2021.
Kumjuh ruh uwei pat u dkhot jong katei ka kynhun ‘Proud Boys’, u Ethan Nordean uba la don 32 snem ka rta, u la shah rai pynshong patok haduh 18 snem haba iadei bad ka jingleh pynkheiñ aiñ jong u ha katei ka jingjia.
