Massachusetts, Nailur:
Ha kane ka khubor la ong ba utei u khynnah 14 snem na Massachusetts, uba la ithuh kum u Harris Wolobah, u la khlad noh ha ka Sngi Thohdieng jong kane ka taiew ba la lah hadien ka jingpyrshang jong u ban ïashim bynta ha ka jingiakob bam ia ki jingbam kiba sat hapoh ka ‘TikTok’.
La ong ba u Harris u la khlad noh tang hadien katto katne kynta ba u la ïashim bynta ha katei ka jingiakob ‘One Chip Challenge’ kaba la ai mynsiem bad pynshlur ia ki khynnah samla ha kane ka kynti ba kin pyni ia ka jinglah bad jingshlur jongki ban bam ia utei u jait jingbam ‘Chips’ uba sat tam ba ka pyrthei ka tip bad ha katei ka jingiakob, la ong ba kito kiba ïashim bynta ki hap ban bam ia utei u jingbam katba ki lah, khlem da dih wat tang khyndiat ruh ka um.
Ka kmie jong utei u khynnah, ka la iathuh ba u khun jongka ha katei ka sngi, u la bam ia utei u jingbam ba la tip kyrteng u ‘Paqui Chip’ ha ka por ba u don ha skul bad tang hadien khyndiat por hi u la ioh kem pang bad shitom kpoh bad la leit shaw noh ia u na katei ka jaka pule jong u na Doherty Memorial High School kaba don ha Worcester da ki bahaiing- hasem jong u hashwa ba un poi hapoh ka jaka sumar.
Kumta, ka kmie jong utei u khynnah ka la pdiang beit ba ka jingkem pang bad jingiap jong u ka long namar jong utei u jingbam uba sat bad uba ktah jur ia ka kpoh jong u.
