Shillong, Nailur 06
Ka kynhun ïalehkai ka Jylla ka la mad ïa ka jingshah rem kaba nyng-kong ha ka lympung ïalehkai Junior Boys’ National Football Championship na ka bynta ka Dr. B. C. Roy Trophy 2023-24.
Kane ka nam rem ka la wan hadien ba ka la shah pynliem noh ha ka West Bengal da 3-2 kol ha ka jingïalehkai jong ka Group-B kaba la long ha ka sngi Balang ha Bhubaneshwar, Odisha. U Tanbir Dey ha kane ka jingïakhun u la ïoh ban thep ar kol na ka bynta katei ka kynhun ïalehkai kaba na Bengal.
Ha kane ka jingïakhun kaba nyng -kong, ka Meghalaya hapoh ka jingïalam u Bah Jeffrey Warlarpih (coach) ka la ioh ban pynkhih jar nyngkong eh lyngba u Mebanlam-lynti Masharing ha ka minit kaba 17 bad kane ka shi kol ka la neh haduh kaba kut jong ka kylla step.
Hadien ba la bteng ïa ka jingïakhun jong ka kylla miet ha kaba ka West Bengal ka la lah ban pynphai kylla ar kol lyngba u Tanbir Dey ha ka minit kaba 61 bad u Sahil Mondal (70). Hadien saw minit ka Meghalaya ka la lah ban pynïakhaid kylla lyngba u Jonathan Mawa.
Hashwa ban kut artad ka jingïalehkai u Tanbir u la thep biang ïa ka kol kaba ar ha ka minit kaba 90+4 na ka bynta ban pynlong ïa katei ka kynhun na Bengal ban khur syndon ïa ka jingjop.
Ka Meghalaya ka dangsah sa ar ki jingïakhun ha kane ka group kata pyrshah ïa ka Jammu & Kashmir ha ka 8 tarik bad ïa ka Kerala ha ka 10 tarik.
