London, Nailur:
Ka United Kingdom (Britain) ha ka Sngi Ba-ar, ka la pynbna ia ka jingpyrshah bad jing bym ai jingkyrshan ia ka kynhun shipai ‘Wagner Group’ na Russia bad ka la khang pyrshah ruh ia ki kam jong katei ka kynhun hapoh Britain namar la ong ba katei ka kynhun ka dei ka kynhun lehnoh na Russia. Kumta, na ka liang jong ka sorkar Britain, ka la khang pyrshah ia ki kam jong katei ka seng lane ka kynhun lehnoh ban iadon bynta ne ban pynroi ia ki kam jongka hapoh u pud- u sam jong ka ri hadien- habud ha ki por ki ban wan. Ka Britain ka la pyniahap kyrdan ruh ia katei ka kynhun Wagner bad ki kynhun lehnoh kiba ka la khang pyrshah hapoh ka ri, kum ka Al-Qaeda bad ka Islamic State.
Katkum ki tyllong khubor ba la ioh lum na Britain, la ong ba ka Britain ka ngeit ba kitei ki kynhun shipai ki dei ki kynhun lehnoh bad kaba la shah pyndonkam kum ka tnat shipai ba kyrpang jong ka Russia ban pyntur shabar jong ka Russia.
Ka Britain, ka la ong ba ka Russia ka shu leh myn leh kum bym don jingiadei bad katei ka kynhun lehnoh jongka, hynrei ka dei hi ka kynhun ba ka la thaw kyrpang naka bynta ki kam saiñ pyrthei jongka.
Namarkata, katkum ki kyndon ba la buh jong ka Terrorism Act 2000, ka tnat kam poh iing jong ka Britain ka don ka hok ban khang pyrshah ia kano- kano ruh ka seng ne ka kynhun kaba kam ibit ban iadon bynta ha ki kam ki jam ne ban pynroi ia ki kam ki jam jongki hapoh u pud- u sam jong ka ri.
Namar kumba la iohi ia ki khubor hapoh Russia, katei ka kynhun shipai Wagner ka ju don bynta ha ki kam lute, ki kam thombor bad ki jingpyniap dusmon kumba long kiwei ruh ki kynhun lehnoh ha kiwei kiwei ki ri.
Kumta, la ong ruh ba ka jingioh lad jong katei ka kynhun ban treikam ha Ukraine, ha Middle East bad ha Africa, ka long ka jingma kaba khraw bah ia ka pyrthei baroh kawei ha kine ki sngi ki ban wan.
Dei na kane ka daw ba ka Britain ka ñiew ia katei ka kynhun shipai kum ka kynhun lehnoh bad ka iai pyrshang ruh katba lah ban ai jingiarap bad kyrshan ia ka Ukraine, kum shi bynta ban ialeh pyrshah ia ka Russia bad ki jingthmu thombor jongka.
Ia kane ka aiñ ban khang pyrshah ia katei ka kynhun ‘Wagner Group’ la wanrah hapoh ka Iingdorbor thaw aiñ jong ka Britain ha ka Sngi Balang.
Ha u Naitung ba la leit, ka Britain ka la pynbna ba ka la khang bad pynngat kyndon ia 13 ngut ki riew shimet bad ki heh nongkhaïi jong ka Russia bad kiba iadon bynta ha ki kam thombor bad jingpyniap dusmon kumba ju leh da kiwei pat ki kynhun lehnoh.
