Shillong, Nailur:
Ka Confederation of Ri-Bhoi People (CORP) Sengkmie ka la pynrem jur ïa ka jingleh jong uwei u pulit uba phong jaiñ ïong bad kah dur ïalade, uba la bret da u stun Grenade ha kawei na ki dukan sha jong ka longkmie Khasi.
“Katkum ka jingïohi lyngba ki video ba la saphriang, kaba pyni ba une u pulit u la kawang ïa u stun Grenades (tear gas) hapoh kane ka dukan kaba don ha parking lot mar pyrshah SBI Main Branch,” la ong ka kyrwoh na u President ka CORP u Bah Bandari Ryntathiang.
Kane ka jingleh jong une u pulit i kumba u don jingthmu ban shim ïa ka jingim jong kiba don hapoh jong kane ka dukan kiba kynthup ïa ki trai dukan bad ïa ki nongwan bam shu donbok ba ha kane ka dukan kim shym la pyndonkam ïa ki tyndong shet (LPG Cylinder) hynrei te ka la jia kaei kaei kaba sngewsih kat ban poi sha ka jingïap ruh ïa kiba don hapoh kane ka dukan, la ong u Bah Bandari.
U la ong ba na ka liang ka seng ka dawa ba dei ban pynshitom ïa une u pulit bad ïa ki ophisar ki bym shym la lah ban tehlakam ïa ki pulit lajong. Ka sorkar ka dei ban pynlong da ka jingtohkit kaba laitluid ïa utei u pulit uba bret ïa u bom da lade hi lane la don ki ophisar kiba aibor ïa u ba un leh ïa katei ka kam beaiñ.
Une u nongïalam ka CORP u la ong ba ka sorkar ka dei ban leit siew bai lutksan mardor ïa ki trai dukan bad kumjuh ruh ka dei ban ai bai dawai ïa kiba mynsaw ha katei ka dukan.
