Shillong, Nailur 06
Ka India ka la bat ïa ka kyrdan ba hakhlieh jong ka Group-A ha ka SAFF U-16 Championship na ka bynta ban jam sha ka semi-final, hadien ba ka la lah ban pynliem noh ïa ka Nepal da 1-0 kol ha ka sngi Balang ha Chang-limithang Stadium kaba ha Thimphu, Bhutan.
Kane ka kynhun ïaleh -kai ka ri ka la lah ban ïalehkai bha naduh kaba sdang pyrshah ïa ka Nepal bad ka la lah ruh ban khanglad ïa ki jingpyrshang jong ka, hynrei u Mohammed Arbash u la ïoh ban thep kol ha ka kylla step.
Ka India, kaba la donkam tang ban shu pynïakhaid na ka bynta ban bat ïa ka kyrdan ba hakhlieh jong ka Group-A, ka la long ka kynhun kaba khlaiñ bor naduh kaba sdang. Kaba kham sngewtynnad hangne ka long ba u rangïalehkai na ka jylla Meghalaya u Manbhakupar Malngiang u la ïoh ban mih madan ha ka kylla miet.
U Usham Singh, uba long u rangthep kol jong ka India ha ka jingïa-lehkai ba la lah pyrshah ïa ka Bangladesh, u la ïoh ïa ka kabu kaba biang bha ha ka minit kaba 15 hadien ba u la ïoh ban rah ka bol hapoh ‘box’, hynrei um shym la lah pynurlong.
Watla u kapten ka Nepal u Subash Bam u la ïoh ïa ka kabu kaba biang, hynrei u Usham Singh u la lah ban pyllait na ka jingshah thep.
Watla hadien ba la bteng ïa ka jingïakhun jong ka kylla miet, ki rangïalehkai ka Nepal ki la ïai pyrshang ban ïakhun tyngeh, ha kaba u kapten u la ïoh ïa ki ar tylli ki kabu ksiar, hynrei u Yaipha-remba Chingkham ula lah ban khanglad na ka jingshah rem bad ban pynlong ïa ka India ban khur ïa ka jingjop kaba ar ha kane ka lympung.
