Paris, Nailur:
Ki bor pyniaid ka Iran ha ka Sngi Ba-ar ki la kem sa ia u mama jong ka Mahsa Amini, kaba long ka nong Kurd-Iran bad kaba la khlad hapoh ka kti ki pulit ha ka por ba ki rah ia ka sha thanat tang namar ba kam shym kup ia ka ‘hijab’ ha ki por ba la leit.
U Safa Aeli, uba la don 30 snem ka rta, u la shah kem noh ha ki bor pahara ka Iran na ka jaka sah jong u ha ka shnong Saqez, kaba don sha ka p hang West jong ka Iran bad la ong ba ki bor pyniaid ki la rah noh ia u sha ka jaka bym shym la ai jingtip eiei.
Ka Hengaw ka la iathuh bad ki bor pyniaid ka Iran ki la phah ia 5 tylli ki kali ba la shong pyndap da ki bor pahara ha katei ka sngi ba la leit ban kem ia u mama jong ka Amini da ka bor, khlem da pynshai ne pyni ruh ia ki kot- ki sla bad ki sakhi- sabut ba u dei ban shah kem bad kumta ruh ki bahaiing- hasem bad ki paidbah nongshong shnong jong katei ka shnong ki la pynpaw ia ka jingpyrshah kaba jur halor ka jingshah kem jong u Aeli namar ka long ka jing kem be-aiñ kaba khlem don nongrim bad khlem da don ia ki sakhi kumba ju dei ka rukom haba leit kem ia kiba don kti ha kano- kano ka kam pynkheiñ aiñ.
Ki lad pathai khubor jong ka Iran, ki iathuh ruh ba ka jinglong jingman ha katei ka shnong Saqez ka don hapdeng ka jingpyrkhing kaba jur, ha kaba ki nongialam jong katei ka shnong ki la bthah ia ki hotel bad ki jaka paidbah ha katei ka shnong ba kim bit ban pdiang ne pynrung ia ki briew ba nabar ha kum kane ka por shwa ba ka jingiap ka Amini kan dap shi snem bad kitei ki nongialam shnong ki la pyndait ruh da ki ‘Camera CCTV’ ha kylleng jong ka shnong bad kumjuh ruh wat ha ka jaka ba la tep ia ka Amini ioh don kino – kino kiba thmu ban dusmon ne pynthud ia katei ka shnong ba ka jingthmu jongki naka bynta katei ka sngi ka jingdap snem ka Amini.
Ka Mahsa Amini, ka long ka samla 22 snem kaba la khlad noh ha ka por ba ki pulit ki rah ia ka sha thanat hadien ba ki la bat noh ia ka katba ka dang leit shang kai bad ki bahaiing jongka, khlem da kup pat ia ka jaiñ kup ‘hijab’ kumba ju dei ka rukom ia ki jaitbynriew baroh hapoh jong ka ri.
Hadien ka jingiap jong ka Amini, ka la mih ka jingiakhih paidbah kaba jur tam hapoh Iran, kaba ka Iran kam pat ju ioh mad mynno- mynno ruh ha ki por bad ki snem ba la leit, ha kaba da ki spah ki la duh noh la ka jingim hapdeng ka jingiakhih bad ka jingiakhun bad ki bor pahara kiba thmu ban pynsangeh jubor ia ka jingiakhih jongki ha u snem ba la leit.
Ki la don bun ngut kiba la shah kem ha ka sorkar Iran namar ka jingiadon bynta jongki ha katei ka jingiakhih paidbah kaba jur hadien ka jingiap jong ka Amini bad bun ngut ruh kiba la shah phasi ha kine ki khyndiat por ba la leit.
