C.B Iawphniaw
Ki tymmen ki ong ba u shynrang Khasi u ioh ïa ka nam 12 bor namar u long shisha u dap shynrang ha ka ïing ka sem, ka kur ka jait, ka shnong ka thaw ha ka kam ka jam ha ka kit ka bah ha ka ktien ka thylliej, ha ka jingnang jingtip, ha ka trei ka ktah ha ka kam ïada ïa ka ïit ka hima bad ha kiba bun ki kam ba u la don bynta ha ka imlang ka sahlang ka ri bad ka jaitbynriew.
Ha ki por mynshuwa khlem don ba peit ïa ka khia ka shon jong ka kur ka jait ïa ki sawdong sawkun ka jaitbynriew. U rangbah u long u riew kiengstieh bad u riew ïaleh ha ki thma bad ïada ïa ka shnong ka thaw na u nongshun nongpen, kiba wan pynjot pynpra ïa ki jingdon jingem bad ka shongsuk shongsaiñ hapoh shnong hapoh thaw. U rangbah u bat ha ïing ha sem kum u kpa bad kum u khlieh ka iing, u bat de kum u kñi ha ka kur ka jait, u bat kum u Matabar uba pyn-ïaid ïa ka shnong ka thaw.
U dei peit ïa ka khia ka shon ka ïing ka sem ki rang-li ki juki, ka shitom ka shipa. U bat ruh ïa ka jait ka kynja. U ïalam lynti ha ki kam baroh kum ha ka trei ka ktah. U peit de ïa ka ïit ka hima ban ïada na u nongshun nongpen kiba wan hiar thma ïa ka shnong ka thaw. Baroh ki kam ki jam ba ïadei bad ki nongshong shnong u long u nong-ai buit ai bor ban ïada bad pynshlur ïa ki kynthei ki khynnah ba tlot bor ban ym sheptieng. Dei na kane ka daw ba bun u rangbah u sa ioh ïa ka nam kum u khadar bor ha ka imlang ka sahlang u Khun Khasi Khara. Haduh mynta ruh ka bor u rangbah kam pat da troin bad kylla ba un long kham hapoh ïa ki kynthei. U rangbah u dang long u nongïalam ïa ka ïing ka sem haduh kine ki sngi ruh. Dei ha u rangbah keiñ ka shong ka mon ba jwat ïa u phi lah ban beiñ hynrei keiñ phin rat. Ka dei ka jingmut ka shong khia haduh katta katta ka bym lah pyndem ïa ka main u rangbah wat la phi ibeiñ ruh ïa u.
