Shillong, Nailur 07
Kum shi bynta ban ïasnoh kti lang ha ka “Khelo India Women’s League” ka ban pynlong ha ki 25 tylli ki nongbah jong ka ri, ka Meghalaya Athletics Association (MAA) kan pynlong ïa ka jingïakop mareh ba la tip kum ka ‘3K and 5K Road Run’ na ka bynta ki kynthei ha ka 21 tarik mynta u bnai ha ka por 7 baje mynstep ha SAI, STC, NEHU.
Kat kum ka kyrwoh ba la pyllait da u General Secretary ka MAA u Bah F.L Pariat, la ong kito ki khynnah kiba don jingthmu ban ïashim bynta, ki lah ban pynrung kyrteng ïalade ha ka shlem treikam jong ka Meghalaya State Olympic Association (MSOA) lane da kaba shu WhatsApp ha u number 9856041365, 9233072206 da kaba ai ïa ka kyrteng pura, ka rta bad ka jaka sah. Ka synjuk ka la pynkhreh ruh ïa ki khusnam na ka bynta ki nongjop kaba long T.2500/-, T.1500/- bad T.1000/- ki syrnod lem bad ki takma na ka bynta kiba wan ha ka kyrdan ba nyngkong, ba-ar bad balai.
