Shillong, Nailur 07
Ka India ka la shah rem noh ha ka Iraq lyngba ka tie-breaker da 5-4 kol hadien ba u Brandon Fernandes u la pynlehnohei ïa ka kabu ksiar ha ka semi final jong ka Kings Cup ha ka sngi Palei ha 700th Anniversay Stadium kaba ha Thailand.
Ha ka jingshisha ka India ka la tam haduh 2-1 kol haduh ka minit kaba 79 hashwa ba u rephri un rai da ka penalty ïa ka Iraq hadien ba u rangïalehkai shakhmat u Aymen Ghadhban u la shah pynur ha ki ar ngut ki rangïalehkai ‘dien ka India hapoh ‘box’.
Ha kum katei ka por u Ghadh-ban um shym la pynlehnohei ïa katei ka kabu ksiar na ka bynta ban pynïakhaid mar 2-2 kol bad rai syndon ïa ka jingjop lyngba ka tie-breaker.
Ha katei ka jingïashut tie-breaker, u Brandon Fernandez uba la shut nyngkong na ka bynta ka India um shym la lah ban thep kol.
Kat kum ki kyndon ha kane ka lympung, ïa ka jingïakhun hap ban rai lyngba ka tie-breaker lada jia ba ki kynhun ki kut ha ka jingïakhun bad ym don ka jingïakhun jong ka extra time.
Kane ka dei ka sien kaba nyngkong eh ba u kapten jong ka ri u Sunil Chhetri u la duh ban ïalehkai pyrshah ïa katei ka kynhun kaba don ha ka kyrdan kaba 70 ha ka pyrthei namar ki daw shimet.
Kham hashwa u Mahesh Naorem u la ïoh ban pynkhih jar nyngkong eh ha ka minit kaba 16 hashwa ba u Karim Ali un pynïakhaid ha ka minit kaba 28 lyngba ka penalty.
Ha ka kylla miet ka India ka la thep biang ia ka kol kaba ar ha ka minit kaba 51 hadien ba u rangapkol ka Iraq u Jalal Hasan u la kut thep hi. Ha ka minit kaba 79 ka Iraq ka la lah ban pynphai kylla lyngba ka penalty ba la shut da u Ghadhban na ka bynta ban ïakhaid mar 2-2 kol.
Watla ka Iraq ka la ïalehkai sa tang shiphew ngut ki rangïalehkai hadien ba u Zidane Iqbal u la shah sei da ka red card na ka daw ba u la kyrsah da ka tymbuit ïa u Brandon Fernandez, hynrei haduh kaba kut ka India kam shym la lah ban thep kol.
