Shillong, Nailur:
Hadien 25 snem ka jingïaid lynti ka Wanz Dance Evolution kaba dei ka jaka hikai shad kaba don ha Mawlai Phudmuri ba la seng da u Bah Wanbet Shangpliang mynta u snem kane ka kynhun ka la ïoh ban pynïar ïa ka shlem shad sa ha Lad Nongkrem.
Ïa kane ka jaka hikai shad la sdang naduh ka 1 tarik mynta u bnai ha kaba la wan plie pyrda da u Bah Embhah Syiemlieh uba dei u MLA barim ka Mawlai konstitwensi ha kaba palat 28 ngut ki hep barit bad ki samla ki la wan ban pynrung kyrteng ïalade.
Kum shibynta ban khring ïa kiba kwah ban shad, u Bah Wanbet u la ïoh ban ai jinghikai ei naduh ka 19 tarik haduh 25 tarik u bnai ba la dep.
Na ka bynta ban pynsuk ïa ka kam ba u trei kum ka jinghikai shad ïa ki phlim bad ki prokram sha ki nongkyndong u la buh ïa uwei u nongïarap ba un hikai ha Lad Nongkrem kata u samla Bantei Lyngdoh Lyngkhoi.
Ka jingthmu ban leit buh ïa ka jaka shad ha Lad Nongkrem ka dei namar kiba tbit ban shad ki bun bha na thaiñ Nongkrem, Smit, Laitkor shaduh Sohryngkham namar kim lah shuh ban wan shaduh Mawlai ba la jngai palat.
Ha kajuh ka por u Bah Wanbet un sa ïoh ban hikai shad ruh sa ïa u Bah Amazing Kurbah uba dei u khlur ïalap ilekshon ha Sohïong ban mih kyrpang ha ka jingrwai ka phlim ‘Dhaka Escape’ ka ban shad bad u Phira Dohtdong, Nadia Syiemlieh, Sherilin Khongwar, Rishisha Mynsong bad Bah Joinpil Pde.
Haba ïakren bad u Bah Wanbet Shangpliang u la ïathuh ba haduh mynta kiba wan shah hikai shad ha Mawlai ki don 126 ngut. Hynrei lada kheiñ naduh ba u sdang ban hikai shad ki la poi palat hajar ngut naduh ki hep barit haduh kiba la samla.
Nalor nangta, u la pynpaw ka jingsngewkmen ba u la im ja ban pyndap ïa ka ïing ka sem da kaba seng ïa kane ka kynhun ban hikai shad.
Namar kata, u don jingkyrmen ba lada u ïoh ïa ka lad ne lada don kiba kwah shad u lah ban plie sa ha kiwei ki district.
Kum ban shu pynkynmaw, u Bah Wanbet u la ïoh ban hikai bun tylli ki jingrwai ha ki phlim Khasi kata naduh ka phlim Jingim, Khohwah Nongsor, Dhaka Escape, Ahor, Satar, Draibar Taksi, ka Student Bangalore bad shi bun tylli ki music video kiba la dep pyllait ha youtube.
