Shillong, Nailur 07
Ka Hill State People’s Democratic Party (HSPDP) ka la pynpaw ba kam donbor ban ïeng ha la ki jong ki kjat namar ka sngewthuh la kajong ka bor haba ïadei bad ka ilekshon MP ka ban sa wan, hynrei kan ap ïa ka United Democratic Party (UDP) ban rai lang lyngba ka kynhun Regional Democratic Alliance (RDA).
Hynrei haba ïadei bad ka ilekshon sha Ïingdorbar District Council, ka HSPDP kan ïakhun kumba ju ïakhun da kaba ïaid marwei.
Haba kylli shaphang kine ki ar tylli ki ilekshon – MP bad MDC, u President ka HSPDP u Bah KP Pangniang u la ong ba ka seng kan ap ïa ka RDA haba ïadei bad ka ilekshon MP ka ban sa wan.
“Kum ka HSPDP ngim sngewdonbor ban ïeng ha la ki jong ki kjat bad ngi sngewthuh la kajong ka bor. Haba ngi donlang ha ka kynhun ngin ap ïa ka RDA. Ha katei ka ilekshon MP (ha u snem 2019) ruh, ngi khlem pynïeng kyrtong namar ba ngi burom ba ka don kynhun (alliance). Lada ka RDA ka don eiei ka jingpynbeit bad jingïakren kaba ïa hun lang, ngin ap ïa kata,” la ong u Bah Pangniang.
U Bah Pangniang u kren ruh shaphang ka jingïatreilang wat lada ym pat lah ban ïatylli lang ki seng riewlum.
U la ong ha ka MP ilekshon ruh ka thong ka long ba don ka jingïatreilang.
Nalor nangta, u la ong ba um pdiang satia ïa ka jingong namar ki don kiba kynthoh ba lada ïatylli u Khasi ka pyrthei kan wai.
Namar kata, u long ba lyngba ka jingïatreilang kan wan ka jingïatylli ki seng riewlum.
Ha kawei pat ka liang, u Bah Pangniang u la ïathuh ba ka HSPDP kan ïakhun kumba ju ïakhun ha ka ilekshon MDC bad kan ïaid marwei, ha kaba ka la sdang ruh ban jied ïa ki briew kiba ka seng kan sei.
U la ong ba ka seng kan ïakhun marwei ha KHADC bad JHADC.
