Khliehriat, Nailur 08
U Rumi Lyngdoh marwei u la khyrwit haduh 4 kol na ka bynta ban pynlong ïa ka Diengshynrum SC ba kan ïoh jingjop bad kumjuh ban ïoh rung shisyndon sha ka semi final jong ka lympung ialehkai 2nd Division Football Tournament ba la pynïaid da ka East Jaiñtia Hills District Football Association (EJHDFA).
Kane ka wan hadien ba ka Diengshynrum SC ka la pynliem noh ïa ka Umlyngsha Youth SSC da 5-0 kol ha ka quarter final kaba lai kaba la long ha madan Artificial Turf kaba don ha Diengshynrum, Khliehriat ha ka sngi Thohdieng.
Nalor ki 4 tylli ki kol ba la thep da u Rumi Lyngdoh ha ka minit kaba 23, 48, 69 bad 81, u Winson Swer ruh ula ioh ban thep ha ka minit kaba 85.
Nalor ka Diengshyn-rum, kiwei de ki kynhun kiba la rung sha ka semi final ki long ka Pamra-kmai SC bad Iatyllilang Hingaria bad ka jing-ïakhun quarter final kaba khatduh kan long haka 11 tarik mynta u bnai.
Haba phai sha ka jingïakhun jong ka 3rd Division, ka Khliehmyn-triang SC bad ka Lummyrli SC ki la rung sha ka quarter final hadien ba ki la khur jingjop ha ka pre-quarter final.
Ka Khliehmyntriang SC ka la pynliem noh ïa ka Ratacherra CSC lyngba ka tie-breaker da 5-3 kol hadien ba ki la ïakhaid kaba mar 1-1 kol.
Ïa ka kol jong ka Khliehmyntriang la thep da u Raplangki Lyngdoh ha ka minit kaba 3, katba ïa ka kol jong ka Ratacherra la thep da u Gradely Mylliem ha ka minit kaba 34.
Ha ka jingïakhun kaba bud, ka Lummyrli SC ka la pynliem ïa ka Bataw FC lyngba ka tie-breaker da 3-2 kol hadien ba ki la ïakhaid mar 2-2 kol.
Ïa ki kol jong Bataw FC la thep bakla da u rangïalehkai ka Lummyrli u Firstborn Pohlong ha ka minit 16 bad u Hiwot Patwet ha ka minit kaba 67, katba ïa ki kol jong ka Lummyrli SC la thep da u Winson Bamon ha ka minit kaba 9 bad u Firstborn Pohlong ha ka minit kaba 83.
