Shillong, Nailur 08
Ka Shooting Association of Meghalaya (SAM) ka la pynlong ïa ka jingpyni ïa ka rukom siat na ka bynta ki khynnah kiba don jingduna ha ki dkhot met ha Bethany Society kaba ha Laitumkhrah, Shillong.
Ha kane ka prokram ki la don haduh 19 ngut ki khynnah kiba la wan ïashim bynta kynthup ia 4 ngut ki nongsiat suloi. Napdeng kitei, 9 ngut ki la lah ban pyni ïa ka sap wat la ka dei ka sien kaba nyngkong ba kin ïoh lad pynpaw ïalade hapoh ka jingsiat kaba hapoh ïing.
Na ka liang u President ka Shooting Association of Meghalaya u Bah John F. Kharshiing u la ong ba ka SAM ka kwah ban sei ïa ki sap jong ki nongsiat suloi ha kaba ka la ailad ïa kiba don jingduna ha ki dkhot met khnang ba ki lah ban ïashim bynta ha ki rynsan ïakop jong ka Para sports.
