Shillong, Nailur 08
U rangïalehkai ka Jylla uba dang 19 snem ka rta, u Damaitphang Lyngdoh u la wanphai noh sha la ïing na ka bynta ban soi ïa ka kontrak bad ka Shillong Lajong Football Club.
Une u rangïalehkai uba na Umlyngka, East Khasi Hills, u la soi ïa ka kontrak kaba ar snem bad ka Lajong hadien ba u la don katto katne snem bad ka Bengaluru FC.
U Damaitphang u dei u rangïalehkai uba kynsai bad uba don ïa ka sap kaba kyrpang ha ka bynta kaba shapdeng namar u la ju mlien ban ïalehkai ha ka Indian Super League (ISL), AFC Cup Qualifiers, Durand Cup bad ha kiwei ki lympung.
Ha ka por ba u dangdon ha ka Bengaluru FC, u Damaitphang u la long uba paw bad u la ïadon bynta ban khur ïa ka nam lahduh ar sien ha ka Reliance Foundation Development League ha ka aïom ïalehkai 2021/2022 bad 2022/2023. U la ïohpdiang ïa ka nam ” Player of the Season 2020/2021″ kaba long shi bynta ka khusnam jong ka BFC Club Award.
Na ka liang ka Shillong Lajong ka la pdiang sngewbha ïa ka jingwan ïasoh u Damaitphang sha ka klob bad ka la khmih lynti ba kane ka jingwan ïasoh ka jong u kan ïarap ban pynkhlaiñ ïa ka kynhun ha ka bynta kaba shapdeng ha ka lympung ïalehkai I-League.
