Hanoi, Nailur:
Katkum ki tyllong khubor ba la ioh lum ha kane ka por, la ong ba u President ka United States- u Joe Biden un sa leit ban jurip sha Vietnam ha ki khyndiat sngi ban wan da ka jingthmu ban nang pynskhem shuh shuh ia ka jingiadei hapdeng ka US bad katei ka ri ha ki por ban wan.
U Biden un long u nongialam uba nyngkong eh napdeng baroh ki President jong ka United States hadien jong u Bill Clinton uba la leit ban jurip sha katei ka ri Southeast Asia ha ki snem 2000, kaba long ruh ka ri ka bym shym la iateh lok eiei bad ka US.
U National Security Advisor jong ka US, u Jake Sullivan u la ong ba da ki phew snem mynta, ka US bad ka Vietnam ki la ialeh ban pynklet noh ia ka jingiashun kaba la don naduh ki por ka thma Vietnam bad ban wanrah noh ia ka jingiadei kaba jan ban ioh iatrei lang kumba ju long bad kiwei pat ki para ri ba marjan.
Namarkata, la ong ba katei ka jingleit jurip jong u Biden sha katei ka ri, ka long ka jingmyntoi kaba khraw na ka bynta ban pynkhlaiñ bad pynskhem ia ka jing-iadei bad ban wanrah ruh ia ka jingiasuk bad ka jingiatrei lang hapdeng kine ki arliang ri ha ki por ban wan.
Kumta la ong ba ha kine ki khyndiat sngi ban wan, utei u nongialam ka United States un sa ioh ban iakynduh markhmat bad u nongialam jong ka Communist Party na Vietnam naka bynta ban ïamir jingmut haba iadei bad ki kam- ki jam ba kine ki 2 ri ki lah ban iatrei lang ban wanrah ka jingmyntoi ia ka pyrthei lashai hadien habud.
Kumta, la ong ba u Biden ha katei ka jingleit jong u, un sa leit ban kynduh ia u President ka Vietnam- u Vo Van Thuong bad u Myntri Rangbahduh jong katei ka ri- u Pham Minh Chinh.
Kane kan long ka kabu kaba khraw ia ka United States ban ioh ban wanrah pat ia ka jingiasuk bad ka jingiadei kaba jan bad katei ka ri, hadien 50 snem ba la khie ka thma hapoh Vietnam ha kaba da ki million ngut ki nong Vietnam bad kumba 58,000 tam ki briew ka US kiba la khlad ha katei ka por.
Ha katei ka jingleit, la khmih lynti ruh ba kan don ka jingiasoi ban iateh lok hapdeng kitei ri, na ka bynta ki kam ki ban sa iatrei lang ha ki por ban wan.
Na ka liang ki nongialam ka Vietnam ruh ki la pynpaw ka jingsngew kmen halor katei ka jingthmu jong ka United States ban plie lad biang ia ka jingiadei paralok ban ioh iatrei lang lashai- la shi sngi.
