Washington, Nailur:
Ka United States ha ka Sngi Balang ka la maham jur ia ka North Korea halor ka jingthmu ban ai jingkyrshan ia ka Russia haba iadei bad ka thma hapoh Ukraine. Kumta, ka White House ha katei ka sngi ka la ong ba ka North Korea kan hap ban kit khlieh lada kano kano ka jingeh kan wan ha ka pyrthei na ka jingleit ai jingkyrshan jong ka ia ka Russia bad kan shah pynngat ruh katkum ki kyndon aiñ jong ka pyrthei lada ka nud shisha ban ai jingkyrshan bad ban phah ia ki tiar iakhun thma jong ka sha ka Russia na ka bynta ban leit hiar thma sha Ukraine.
Namar kumba la iohsngew bad iohi lyngba ki khubor ba la pyn phriang hi da ki lad pathai khubor jong ka North Korea ha ki khyndiat sngi ba la leit, la ong ba utei u nongialam ka North Korea, u Kim Jong Un, u la pynbna ba un sa leit ban jurip sha Russia ban leit iakynduh markhmat bad u President ka Russia- u Vladimir Putin bad ban iakren halor ka jingphah ia ki tiar thma jong ka North Korea sha Russia, khnang ba ka Russia kan ioh ban pyndonkam hapdeng ka jingiakhun thma jongka pyrshah ia ka Ukraine.
Kumta, na ka liang jong ka United States bad kiwei pat ki ri kiba pyrshah ia ka jingleit hiar thma jong ka Russia ia ka Ukraine, ki la pynpaw ka jingpyrshah ia ka North Korea ba kam dei ban leit ai jingkyrshan ia ka Russia da katei ka rukom namar ka jingleit iadon bynta jongka ha kane ka por, ka lah ban ktah pat ia ka pyrthei baroh kawei hadien habud.
