Shillong, Nailur 11
Ka Mawlyngngad SC ka la pynliem noh ïa ka Mawkriah West SC da 2-0 kol na ka bynta ban khur ïa ka jingjop ha ka lympung ïalehkai SSA U-20 4th Division Football League 2023 ha ka lah sngi U Blei.
Ha kane ka jingïakhun kaba la long ha madan 3rd Ground, Polo, baroh ar kynhun ki la ïakhun tyngeh naduh kaba sdang. Dei ha ka minit kaba 26 ba ka Mawlyngngad ka la ïoh ban pynkhih jar nyngkong eh lyngba u Nathaniel Kharbangar. Kane ka shi kol ka la nangpynioh mynsiem ïa kane ka kynhun ha kaba ka la ïai neh haduh kaba kut jong ka kylla step.
Hadien ba la bteng biang ïa ka jingïakhun jong ka kylla miet, ka Mawlyngngad ka la pynbud biang ïa ka kol kaba ar lyngba u Banskhembok Warshong ha ka minit kaba 70.
Watla ka Mawkriah West ka la pyrshang ban ïakhun tyngeh, hynrei kam lah ban pynphai bad ka la mad ïa ka jingshah rem.
Haba phai sha kawei pat ka jingïakhun kaba ar hapdeng ka Mawnianglah Youth SC bad ka Risa Colony SC ki la ïasam mar shi point hadien ba ki la ïakhaid mar 1-1 kol.
Watla kine ki kynhun kim shym la lah ban thep kol ha ka kylla step, hynrei dei ha ka kylla miet ba ka Risa Colony ka la ïoh ban pynkhih jar nyngkong eh lyngba u Peterstone Lamare ha ka minit kaba 52.
Hadien katto katne por ka Mawnianglah Youth ka la lah ban pynphai kylla lyngba u P. Nongkhlaw ha ka minit kaba 62. Haduh kaba kut kine ki kynhun kim shym la lah pynphai bad ki la kut ha ka jingïakhaid.
Ka jingïalehkai ha ka sngi Ba-ar kan long hapdeng ka Mawlynrei SC pyrshah ia ka Madan S&CC ha ka por 3:15, katba ka Umrynjah SC ïa ka Dilingiem YSCWA por 4:45 janmiet.
