Shillong, Nailur 11
Ka South Garo Hills District Cricket Association bad ka Shillong Cricket Association ki la khur ïa ka jingjop ha ka lympung ïalehkai U-19 Girls Inter District Cricket Tournament ba la pynïaid da ka Meghalaya Cricket Association ha lah sngi U Blei.
Ka jinglah ban kamai ka Jayshree Singh (105 not out) ka la pynlong ïa ka SCA ban pynliem noh ïa ka West Jaiñtia Hills DCA da 149 run ha Umbuda kaba ha Ri-Bhoi ha ka Zone 1 (Group-B), katba ka SGH ka la jop da 8 wiket ïa ka North Garo Hills DCA ha Salpara jong ka Zone 2.
Ha kane ka jingïakhun ka Jayshree ka la ïoh ban khyrwit haduh 17 tylli ki ‘four’ ha kaba ka la pynlong ïa ka Shillong CA ban kamai 227/5 ha ki 29 over. Ki nongkawang bol ka liang pyrshah kiba la lah ban pynhap wiket ki long ka Sawakahi Syngkon (2/44) , Yoolang Suting (1/39) bad ka Doliza Lyngdoh (1/49).
Haba wan beh ïa ka thong, ka WJH ka la lah ban kamai tang 78 run hadien ba ka la shah pynkhyllem baroh ki nongtied ha ki 23.3 over. Ka Mercia Able Dhar ka la long ka nongtied kaba la ïoh bun da kaba kamai 11 run. Ki nongkawang bol SCA kiba la lah ban pynhap wiket ki long ka Natasha Rabha (4/20), Monica Singh (3/7) bad ka Jennyfer Fancon (2/17).
Ha kawei pat ka jingïakhun, ka NGH kaba la shimti ban tied nyngkong ka la kamai 66 run bad shah pynhap wiket baroh ki nongtied ha ki 25.2 over. Ka Dianchidora N Sangma (2/5) bad ka Rikmanchi M Sangma (2/7) ki la khur mar ar wiket na ka bynta ka SGH.
Haba wan beh ïa ka pali kaba ar, ka SGH ka la lah da kaba suk ban kynjoh sha ka thong ha ki 13.5 over. Ka Jaylynn R Marak (11 not out) bad ka Janicka R Marak (11) ki la lah ban noh synñiang ha kaba tied. Katba ki nongkawang bol ka NGH kiba kynthup ïa ka Jessica Marak (1/14) bad ka Chigame Marak (1/18) ki la khur mar shi wiket.
Ha ka sngi Ba-ar kan dei ka jingïakhun kaba kaba khatduh jong kane ka jingïalehkai (group). Ha ka Zone 1 (Group-A), ka East Khasi Hills CA kan ïakhun pyrshah ïa ka Ri-Bhoi DCA, katba ha ka Zone 2 ka SGH kan ïakhun sa ïa ka East Garo Hills DCA.
