Tafeghaghte, Nailur:
Katkum ki khubor la ong ba ki tnat iarap jong ka Morocco tad haduh ka Sngi U Blei, ki dang iakhun shitom ban ioh sei bad ioh pyllait im lada dang don kiba im bad sahkut hapoh ki ïingmala kiba la julor bad ha ki jingtei kiba la khyllem ha kylleng ki bynta jong ka ri, da kaba pyndonkam ruh ia ki jait tiar kiba khlaiñ bor ban lah ban kyndang bad sei ia ki briew kiba sahkut hapoh ki kynrum- kynram ba la twa bad julor.
Kumta ruh la ong ba ki para ri ba marjan ki la phah ia ki tnat iarap jongki ban leit iarap sha katei ka ri kaba don sha ka phang North jong ka dew Africa ha ka jingioh mad jong katei ka ri ia utei u jumai uba khlaiñ bad uba jur tam, ha kaba 2,122 tam ki la khlad bad kumba 2,400 tam ruh kiba la ngat bad mynsaw ha utei u jumai.
Utei u jumai uba la khñiuh ha ka Sngi Thohdieng jong ka taiew ba la lah, u la don kumba 6.8 Magnitude bad u la pynkhñiuh ruh ia kumba 72 kilometre lane 45 miles jong ka thaiñ Southwest baroh kawei bad baroh ki shnong kiba don ha katei ka thaiñ lum jong ki lum Atlas ki la um lut ha une u jumai ha katei ka sngi.
Ha katei ka Sngi U Blei ruh, u jumai uba 4.5 Magnitude u la pynrah mynsiem biang ia ki paidbah jong katei hi kajuh ka thaiñ kaba mad ia utei u jumai, hynrei une u jumai u la shu iaid lynti bad um da jur shuh kumba long ha ka Sngi Thohdieng bad ym shym don kiba ngat ne mynsaw eiei ha utei u jumai uba ar.
La ong ba ka shnong ba shajrong lum jong ka Tefeghaghte, kumba 60 kilometre na Marrakesh, ka la julor bad um lut thiaw ha ka jing lynshop jong utei u jumai bah ha katei ka jingjia, ha kaba ki don sa tang iwei- ar tylli ki iing briew kiba dang neh ban ïeng.
Bun na kitei kiba don ha katei ka shnong, ki la khlad noh na ka jingshah ban ha ki iing ba ki shong ki sah.
Kumjuh ruh ka shnong Amizmiz, kaba don hajan ka Tafeghaghte, ka long ka thaiñ kaba la shah ktah jur bha ha utei u jumai bad kine ki 2 tylli ki shnong ki dei kiba ioh mad ia bun tylli ki jingiap kumba 1,351 ngut kiba khlad tang napoh jong kitei ki 2 tylli ki shnong.
Katkum ka kaiphod ba la ioh lum, la shem ba palat 18,000 tylli ki longiing kiba la shah ktah ha utei u jumai
Ki paidbah nongshong shnong ka Morocco ha ka Sngi U Blei, ki la leit mareh sha ki jaka sumar bapher ban leit ai snam ia kito kiba donkam snam bad kiba la mynsaw na utei u jumai ha katei ka ri.
Ka tnat iada jong ka Spain, ka la pyntip ba la phah ia ka liengsuiñ A400 kaba la mih na Zaragoza ha ryngkat 56 ngut ki briew jong ka kynhun iarap bad 4 tylli ki ksew bud dien badn leit poi sha Marrakesh naka bynta ban leit khyllie bad wad ia kiba sahkut ha kito ki jaka ba la twa.
