Jowai, Nailur:
Kan long ka sngi sah kynmaw ïa ki nongshong shnong ka shnong Ïalong khamtam ki nongrep namar ïa ka jingkieng doi-doi kaba la shna halor ka Wah Myntdu la plie paidbah ïa ka ha ka Sngi Saitjaiñ.
Kane ka jingkieng ka ban kam sha shiliang ka Wah Myntdu la tip ïa ka kum ka Ïalong Um-Dalong Footbridge (?along Suspension Footbridge) kaba don ha ka wah kaba ka shnong ka pynlong kum ka ‘Fish Sanctuary’.
Ïa katei ka jingkieng la wan ban plie paidbah da u MLA ka thaiñ, u Bah Wailadmiki Shylla ha ka jingdonlang u MDC ka Musiang-Rangat, u Bah Phasmoon Dkhar kum u Symbud Kongsan, ki ophisar Sorkar lem bad kiwei-kiwei.
U Waheh Shnong ka Ïalong, u Bah T. Ram Phawa ha ka jingkren u la ong ba kane ka jingkieng dei kaba la sahteng naduh u snem 2016 bad hadien ka jingshimti jong ka Executive Committee kaba thymmai ha ka jingïalam jong u, kum u Waheh Shnong la sdang biang ban pyntrei ïa ka ha u snem 2021 ha ka jinglut kaba T.65 lak.
U la ong ba ka jinglah ban pyndep ïa katei ka jingkieng kan kyrkhu ym tang ïa ki nongshong shnong bad nongrep hynrei ka long ruh ka jingmyntoi ïa ki nongshong shnong ha kaba ïadei bad ka kam jngohkai pyrthei.
U BDO ka Thadlaskeiñ, u Dr. Brightstar Langbang u la ong ba ïa ka jingtei la bei lyngba ka skhim Mahatma Gandhi National Rural Employment Guarantee Act jong u snem 2015-2016 kumba T.45 lak 50 hajar na ka tnad MBDA kumba T.16 lak 25 hajar na u synniang shnong T.3 lak 25 hajar, skhim MP, T. 8 lak bad na ka Chief Minister Fund T. 10 lak.
U Bah Wailadmiki Shylla ha ka jingkren u la ïaroh ïa ki nongïalam shnong bad ïa baroh ki nongshong ka Ïalong kiba don ka mynsiem ïatreilang na bynta ka bha ka miat bad ka roi ka par jong ka shnong.
U MLA u la pynsngew ruh ïa ka jingkular jong u Myntri Rangbah ka Jylla, u Conrad K. Sangma ban mang kumba T.20 klur na bynta ban pynbha pynmiat ïa ki surok, ki lynti synkien bad ban pynlong ïa ka shnong Ïalong kum ka ‘Model Village’ ha kine ki 5 snem ban wan.
Ïa ka jingialang la pynïaid da u Bah Masan War, Secretary Shnong Ïalong bad la ïoh ki kyntien pdiang na ka Kong Shimti Pale bad la pynphuh pynphieng ïa ka jingïalang da ki jingshad na ki longkmie, ki khun samla bad ki hep barit jong ka Dorbar Shnong Ïalong.
