Kyiv, Nailur:
Ka Russia ha ka Sngi U Blei ka la leit thombor dusmon ia ka Ukraine haduh 32 tylli ki drone kiba ka la phah shi miet- shi miet bad kiba bun na kitei ki drone ki dei kiba thmu ban leit thombor shapoh jong ka nongbah kaba pdeng.
Ka tnat iada jong ka Ukraine ka la pyntip ba napdeng kitei ki drone ba la phah da ka Russia, 25 tylli la ioh ban siat pynhap noh da ki shipai ka Ukraine.
Katei ka jingleit thombor jong ka Russia ha kane ka por ka long ruh hadien ba ka Ukraine ka la kyrpad ia ki para ri ba marjan na ka thaiñ West ba kin ai jingkyrshan lem ha kane ka sien iakhun ba tyngeh jong ka Ukraine pyrshah ia ka Russia.
U heh ka tnat shipai ka Ukraine u la iathuh ba ha katei ka miet, ka Russia ka la phah haduh kumba 32 tylli ki drone ban leit thombor sha katei ka nongbah, ha kaba ki shipai ka Ukraine ki la ioh ban siat pynhap noh 25 tylli.
La ong ba kitei ki drone ki la leit ban rung sha katei ka nongbah da ki kynhun- kynhun shi sien rung bad ki leit rung na kylleng ki bynta jong katei ka nongbah.
Kumta la ong ruh ba bun tylli ki distrik kiba la julor bad shah ktah jur na katei ka jingleit thombor jong ka Russia ha katei ka miet.
Ha u bnai ba la lah, ka Ukraine ka la ioh ban siat pynhap ia kumba 20 tylli ki drone bad ki ‘namding ba la phah leit thombor da ka Russia ha ka sien thombor kaba jur bha ba ka Ukraine ka la mad ha utei u bnai.
Kumta, u Myntri ka tnat iada ba thymmai jong ka Ukraine- u Rustem Umerov u la kyrpad ia ki para ri ba marjan naka bynta ki jingiarap khnang ba ka Ukraine kan lah ban tehlakam ia kitei ki jingleit thombor jong ka Russia. Namar u la ong ruh ba ka Ukraine ha kane ka por ka donkam da ki tiar kiba kham khlaiñ bor bad kiba iahap bor bad ki tiar thma jong ka Russia.
U President ka Ukraine, u Vododymyr Zelensky u la ong ba ka jingslem ban ioh ia ki tiar iakhun thma na ki ri ba marjan, ka la pyn troiñ pat ia ka Ukraine hapdeng ka jingïaleh jongka ban iada bad ban iakhun pyrshah ia ka jingleit thombor jong ka Russia ha kine ki sngi.
U heh Deputy Intelligence- u Vadym Skibitsky ha ka Sngi Saitjaiñ u la ai jingkheiñ antad ba da kumno- kumno ki shipai jong ka Russia ki don kumba 4,20,000 ha ki bynta East bad South jong ka Ukraine, kynthup lang ia kiba don hapoh Crimea. Bad u la ong ruh ba ka Russia mynta la kumba shi bnai, ka ju phah hiar thma ia ki shipai jongka napoh Crimea, kaba long ka nongbah ba ka Russia ka la ioh knieh na ka Ukraine naduh u snem 2014.
