Khliehriat, Nailur 11
Ka Pynthorsale SC bad ka Rymbai Madanpynriang ki la buh jaka ïalade sha ka jingïakhun Quarter Final jong ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan hadien ba ka Pynthorsale SC ka la pynliem noh ïa ka Mutong Youth SC da 2-1 kol, katba ka Rymbai Madanpynriang SC ka la pynliem ïa ka Umrasong SC da 6-1 kol ha ka jingïakhun pre-quarter final kaba la long ha madan Artificial Turf kaba don ha Diengshynrum, Khliehriat ha ka lah sngi U Blei.
Ïa ki kol jong ka Pynthorsale SC la thep da u Kyrmen Dkhar ha ka minit kaba 17 bad u Amos Phawa (42), katba ïa ka shi kol jong ka Mutong Youth SC la thep da u Seven Phawa (11)
Ha ka jingïakhun kaba bud, ïa ki 6 tylli ki kol jong ka Rymbai Madanpynriang SC, u Donaldo Dkhar ula ïoh ban khyrwit da ka hat-trick ha ka minit kaba 4, 32 bad 65, hadien la bud sa ki kol jong u Rimiki Rymbai ha ka minit kaba 8 bad 75 bad u Baniengskhem Thoo ha ka minit kaba 70. Katba ïa ka shikol jong ka Umrasong SC la thep da u Jan Mukhim ha ka minit kaba 37.
