Shillong, Nailur 11
Shi bynta ban rakhe ïa u mawmer ka jingdap ba 50 snem, ka Maraikaphon Youth Club (MYC) ha ka sngi Saitjiañ ka la plie ïa ka lympung ïalehkai U-14 Football Tournament ba la wan ïashim bynta da 23 tylli ki kynhun.
Ïa kane ka lympung ïalehikai la ïarap ban bei pisa ïa ka da ka Sorkar Jylla lyngba ka skhim Chief Minister Youth development Scheme 2022-23 kaba la wan lyngba ka shlem treikam jong ka Deputy Commissioner, East Khasi Hills District.
Ïa kane la lympung la wan ban plie da u Syiem ka Hima Sohra u Pa’iem Freeman Syiem ha ryng-kat ka jingïadon lang u Rangbah Shnong ka Maraikaphon, u President ka Sohra Sports Association lem bad ki dkhot nongkitkam jong ka MYC.
Ïa kane ka lympung ïalehkai la pynlong ha madan ïalehkai ha dong Maraikaphon, kaba dei kawei na ki madan bna nam kaba juh pynlong ïa kiba bun ki lympung ïalehkiai ba kyrpang ïa ki khynnah barit ha ka shnong Sohra.
Ki 23 tylli ki kynhun kiba la wan ban ïashim bynta sha kane ka lympung ka kynthup ïa ka Mawkma YC, Nongthym -mai (Jr), LSC, MYSCA, Synroplang United, Maw-sahew United, Nongsteng SCX, SS MawkisYiem, Ritiang United, Wahkaliar FC, SSK (B), CPYC, MYC (B), SS Mawmluh, Nong-rim SC, Turshaphrang FC, 16 Bro’s, SSK (C), Laityra (Jr), United FC,. SSK (A) bad ka Mawphu SC.
Ïa ka wat kaba nyngkong ki bor pynïaid ki la pynlong ïa ka da ka knockout system ban bud pat da ka league system ha ka wat kaba ar.
Ha kaba kren kum u kongsan ha kane ka jingïalang plie, u Pa’iem Freeman Syiem u la ong ba u sngew lehraiñ ban shem bad ïohi ba dei tang ka thaiñ Sohra ka bym juh don shuh ka jingïalehkai phutbol, ha kaba u la pynpaw ba ha ki por ba u dang long kum u khynnah u la juh ïalehkai ha kane ka madan ha ka lympung ïalehkai 4ft 6 inch ne 4ft 8 inch.
Ïa ka jingïalehkai sdang jong kane ka lympung la ïakhun hapdeng ka Mawkma Youth Club pyrshah ïa ka SSK.
