Shillong, Nailur 12
Ka Bengaluru kan long kawei na ki nongbah ka ban ïoh pynlong ïa ka Subroto Cup International Football Tournament, ka ban sdang naduh 19 tarik mynta u bnai haduh 23 tarik u Risaw ha lai tylli ki jaka.
Kham hashwa ïa kane ka lympung ïalehkai inter-school football tournament kaba la rim bha la pynlong ha Delhi bad Gurugram.
Ka Under-17 junior jong ki shynrang bad kynthei yn pynlong ha Delhi-NCR, katba ka Under-14 sub-junior boys competition yn pynlong ha ASC Centre, Air Force School, Jalahalli bad ka Air Force School, Yehalanka kaba ha Bengaluru.
Ha Delhi-NCR, ïa ki jingïalehkai yn pynlong ha Ambedkar Stadium, Tejas Football Ground (Delhi), Subroto Football Ground (Delhi) bad ha GD Goenka School (Gurugram).
Ha kane ka lympung kin don haduh 109 tylli ki kynhun na ki 27 tylli ki jylla bad Union Territory ki ban ïashim bynta ha ki lai tylli ki kyrdan ïalehkai. Ki kynhun na Bangladesh bad Nepal ki long ki ar tylli ki kynhun nabar ri ki ban ïashim bynta ha kane ka lympung ka ban don haduh 180 ki jingïalehkai.
Ka Pilgrim Higher Secondary School, Dima-pur (Nagaland) ka dei ka lahduh ha ka junior boys, katba ka St Patrick’s School, Gumla (Jharkhand) ka long ka ladhuh ha ka junior girls. Ha ka sub-junior boys, la rah da ka Heirok Higher Secondary School, Imphal (Manipur) ha u snem ba la lah.
“Ka 62nd Subroto Cup kan long ka jingsah kynmaw ban pynlong ha Bengaluru ha ka sien kaba nyngkong eh. Ka don ka jingthmu ban pynlong ïa kane ka lympung ha kylla ki bynta jong ka ri,” la ong u Air Marshal u RK Anand, vice-chairman ka Subroto Mukerjee Sports Education Society.
Mynta u snem ka Meghalaya kan ïashim bynta lai tylli ki kynhun kata ha ka Under-14 yn mihkhmat da ka H.K. Sing Secondary School na West Jaiñtia Hills, ka Assam Rifle Public School (EKH) ha ka Under-17 Boys bad ka Saiden Secondary School (Ri-Bhoi District) ha ka Under-17 Girls.
