Rabat, Nailur:
Katba ki kynhun iarap ki dang leit ban khyllie bad sei ia ki metiap kiba sahkut hapoh ki kynrum-kynram jong ki iing-ki sem ba la twa bad julor hapoh Morocco hadien u jumai bah uba la khynñiuh ha ka Sngi Thohdieng jong ka taiew ba la lah, la ong ba ka jing-iap bad jingdon kiba mynsaw ka la nang kiew shuh- shuh katba nang ioh ban lum jingkheiñ suki-suki katba dang lap ia ki.
Kumba la iohi ha kine ki khyndiat sngi ba la leit, u jumai uba 6.8 Magnitude u la pynkhynñiuh ia ka thaiñ lum Atlas jong katei ka ri Morocco ha ka miet Sngi Thohdieng jong kane ka taiew ba la lah, ha kaba palat 2,862 ngut ki la khlad noh bad kumba 2,500 tam kiba la ngat bad mynsaw ha katei ka jingjia.
Kumta la ong ba ka tnat Dissaster Community jong ka Talat Nyacoub ka la phah ia 12 tylli ki kali kit nongpang bad da ki phew ngut ki briew ka kynhun shipai 4x4s bad kumjuh ruh ia ki kynhun pulit ha ryngkat ruh ba 100 ngut ki briew jong ka kynhun iarap ban leit khyllie bad wad ioh don kiba dang don jingim hapoh jong ki kynrum-kynram jong ki iing- ki sem ba la twa bad ban ioh sumar noh ia ki ha ka por kaba biang lada dang ioh ban sei im ia ki na ka jaka ba ki sahkut.
La iohi ruh ia ki kynhun iarap na ka ri Spain ba marjan, kiba la wan ban iarap ha ryngkat katto katne ki doktor bad ki nos ha katei ka kynhun, kiba la leit poi sha kane ka ri bad kiba dang iatrei lang bad ki briew na kane ka ri, naka bynta ban iarap ia katei ka ri ha kum kane ka por ba ka iakynduh jingeh bad donkam ia ka jingiarap.
Kumta la ong ba ki kynhun iarap ka Morocco bad jong ka Spain, ki la trei shitom ban leit wad ioh don kiba dang don jingim bad kiba dang sahkut hapoh jong ki iing ba la khyllem ha madan-madiah khamtam ha ki shnong ba shajrong lum kiba la shah ktah jur bha ha utei u jumai.
Shuh shuh ruh la ong ba ki shipai ka Morocco pat ki dang ialeh ban sam ia ki lad jingiarap khamtam ka nep ‘blanket’ sha baroh kito ki paidbah kiba la shah ktah ha utei u jumai bad kiba la shong-khlem iing-khlem sem bad kiba la duh noh ruh wat ia la ki baieid- bathoiñ ha katei ka jingjia ba sngewsih.
Ha ki bynta nongkyndong jong ka Ighil pat, kaba long ka thaiñ kaba shah ktah jur bha ha utei u jumai, la iohi ia ki liengsuiñ ‘helicopter’ kiba leit ban hiar man la ki kynta bad kiba leit pynpoi ia ki dawai- dashin bad ki tiar ai jingsumar ban ioh sumar ia kito kiba mynsaw bad ngat ha katei ka jingjia.
Wat ki surok kiba dei ban poi bad iaid lyngba sha kitei ki shnong pat, bad ki kali kiba leit kit ia ki jingdonkam bad ki dawai- dashin ki la shu ïeng laiñ bad sahkut ha ki surok namar ka jingkhang lad jong ka ktieh bad ka khyndew kaba la tap bad pynjah lynti ia ki surok kiba don ha katei ka thaiñ.
