Cairo, Nailur:
Ha kane ka khubor la iathuh ba 43 ngut ki briew ki la khlad na ka jingleit thombor ki drone hapoh ka nongbah Khartoum jong ka Sudan ha ka Sngi U Blei.
Kane ka jingleit thombor ka la long ha ki bynta jong kawei ka iew kaba don ha katei ka nongbah bad ka long ruh ka daw jong ka jing-iaknieh bor hapdeng ki kynhun shipai kiba kwah ban synshar donbor hi ia ka ri.
Shuh shuh ruh la ong ba kumba 55 ngut kiwei pat kiba la ngat bad mynsaw ha katei ka jingjia bad ka long ruh ka nongbah ba marjan bad ka thaiñ ba jur ka jingiakhun hapdeng kitei ki 2 kynhun bad ia kitei kiba mynsaw baroh la pynkit bad phah sumar sha ka Bashair University Hospital.
Ki tnat bapher kiba iarap ban pyniaid bad sam ia ki lad jingiarap sha katei ka nongbah, ki la pyllait ia ki dur jong katei ka jingjia ha katei ka sngi, ha kaba la iohi ia ki metiap ba la sop ha ki jingsop ba rong lieh bad ba la buh ha ka jaka ba lait hakhmat katei ka hospital hadien ba la pynbna iap ia ki.
Ka Sudan ka la ioh mad ia shibun tylli ki jingjia ia-kynad naduh u Iaiong jong une u snem hapdeng ka jing iaknieh bor jong ka kynhun shipai katei ka ri, hapoh ka jingialam jong u Gen. Abdel Fattah Burhan bad ka Rapid Support Forces, ba la ialam da u Gen. Mohamed Hamdan Dagalo.
Na ka liang ka RSF, ka la kynnoh ia katei kawei ka kynhun shipai haba iadei bad katei ka jingleit thombor jong ki drone ha katei ka Sngi U Blei. Watla katta, ym pat lah ban pyntikna ia kiba don kti ha katei ka jingjia.
