Queensland, Naillur:
Uwei u rangbah na Australia, u la khlad noh hadien ba u la shah puh bseiñ katba u dang pyrshang ban phut ia utei u bseiñ na ka kjat jong u paralok ha katei ka jingjia. Kane ka la jia ha ka Sngi Saitjaiñ jong kane ka taiew ba la lah katba kitei 2 ngut ki dang leit ban iadon bynta ha ka jingrakhe dap 100 snem ka Koumala State School kaba don ha ka phang pdeng jong ka Queensland.
La ong ba ha katei ka por, haba utei u rangbah 69 snem u la iohi ia utei u bseiñ ba u la kyllaiñ ia ka kjat u paralok jong u, u la pyrshang ban leit phut bad pyllait ia utei u bseiñ na ka kjat utei u paralok bad u la shah puh ruh ha utei u bseiñ la bun-bun sien. Kumta, la ong ba hadien ba u la shah dait bun sien na ki bynta ka kti bad ka shadem, utei u briew u la ioh pang ‘Cardiac Arrest’ bad u la khlad noh tang hadien kumba katto katne por hadien katei ka jingjia wat haba ki briew jong ka kynhun ka koit- ka khiah ki la ialeh shitom ban pynim ia u da kiba bun ki rukom.
La ong ba kitei ki briew kiba don ha katei ka jaka, ki la pyntip bad phone ia ki kali kit nongpang bad ki briew jong ka kynhun sumar ruh ki la leit ban poi mar-mar hi sha katei ka jaka tang hadien khyndiat por ba utei u rangbah u la kyllon iapler.
Ha kawei pat ka liang, ka long kaba donbok ia utei u rangbah uba la don ha ki juh hi ki rta ba 60 snem shalor, naba ki la ioh ban pynkit noh ia u mar-mar sha ka Mackay Base Hospital bad la ioh ban ai jingsumar ia u ha ka por kaba biang bad mynta u la lait na ki jingma.
Hadien kane ka jingjia, ki paidbah khynnah- samla bad rangbah kiba bna ia kane ka khubor lyngba ki rynsan ‘Social Media’, ki la ïaroh ia ka jingkloi ban len lade jong utei u rangbah naka bynta la u jong u paralok bad ki la khot ruh ia utei u rangbah ba khlad da u ‘Hero’ bad ‘U paralok bad para marjan’ ba shisha.
Watla katta, la ong ba haduh mynta ruh kim pat lah pat ban pynithuh ia utei u jait bseiñ uba ioh dait ia kitei ki 2 ngut ha katei ka jingjia, hynrei la shu pyntip ba ka bih kaba don ha utei u bseiñ ka long kaba khlaiñ haduh katta bad kaba ktah jur ia ka met u briew haba utei u jait bseiñ u ioh ban puh bad pyn ngam ia ka bih hapoh ki dkhot met jong u briew.
La ong ba ki jingjia shah puh bseiñ hapoh Australia ki long kiba khah- khah bad kumba 3000 tylli kum kine ki jingjia ki ju jia ha man la u snem, hynrei ka jingiap pat kam ju kham jia namar bun ki dei ki jait bseiñ ki bym da long bih bad kumta kiba bun kim ju kham iap thala wat hadien ba ki la shah puh bseiñ.
Ha kajuh ka por ruh, la ong ba ka Queensland ka long ka thaiñ kaba don ia kumba 78 tylli ki jait bseiñ kiba long bih, ha kaba 12 tylli napdeng kitei ki jait bseiñ ki dei kiba khlaiñ bad kiba long bih haduh katta bad ka long ruh ka jingma kaba khraw ia kito kiba ngat ne shah puh ha kum kitei ki jait bseiñ.
