Khliehriat, Nailur 12
Kawei ka longkmie ïa kaba la tip kyrteng kum ka Kong Priskila Suchiang ka la shah pynïap dusmon ha ki briew ba la suba ba ki dei na Bangladesh.
Kane ka la jia ha ka Lah Sngi U Blei ha ka por kumba 11 baje mynstep ha ka jaka ba la tip kum ka Donaskur ha East Jaiñtia Hills.
Kane ka longkmie ka don arngut ki khun bad ka dei kaba ju khaïi lyngba ki jaka khappud.
Katkum ka khubor ba la ïohlum na ki pulit ka East Jaiñtia Hills ha ka Sngi Ba-Ar, la ong ba hynnin ka sngi, katei ka longkmie ka la leit sha lyngkha, hynrei ka khlem wanphai shuh sha la ïing. Hadien ba ka khlem wanphai ïing, ki nongshong shnong ki la suba sniew.
Namarkata, ki la pynlong ïa ka jingwad shnong sha ki bynta ba don ka lyngkha jong katei ka longkmie bad ki la lap pynban da ka metïap jong ka ha kaba la suba ba ka la shah pynïap. Ki pulit ki la ong ba ka jaka ba la lap ïa ka met ka jngai sa tang kumba 50 haduh 100 metre na khappud Bangladesh.
Ki pulit ki dang ap mynta ïa ka kaiphod jong ka ‘post mortem’, hynrei ki la ong ba la suba ba ka la shah pynïap da ki tiar ba nep bad la bret ruh ïa ka nalor shapoh.
Na ka liang ka Khasi Students’ Union (KSU) Narpuh Circle hadien ba ka la ïoh jingtip halor kane, mynta ka sngi ka la hiar mar-mar sha shnong Donaskur hapoh ka jingïalam u Phanuel Tongper. Ka KSU ka ïathuh ba katei ka Kong Priskila Suchiang ka la don kumba 45 snem ka rta.
Ka KSU ka la ong ba kane ka longkmie kaba na katei ka shnong bad kaba la don ar ngut ki khun ka dei kaba ju khaïi lyngba ki jaka khappud bad ka Bangladesh bad uwei u Muslim. Katkum ka jingïathuh jong ki trai shnong, kane ka longkmie lem bad u khun shynrang ki la mih ban ïaid da ka kjat haduh ban da poi ha kawei ka ïing trep kaba katei ka longkmie ka ju shongthait.
Hynrei une u khun jong ka u la ong ïa la ka kmie ba kan shong shiphang bad ma u un leit wad lynti ban pynpoi ïa ki mar, hynrei hadien ba u la wanphai sha kajuh ka jaka u la shem pynban ba ka kmie jong u ka la thiah lyngktar ha madan ha ryngkat ka jinglyngkien jong ka snam.
La ong ba une u khun u la pyrta lynñiar bad mareh ban pyrta briew, bad na ka liang ki nongshong shnong ruh ki la wan poi bran-bran ha kaba la lap ba ïa ka met jong ka ba la mait dusmon da ka wait ïa ka dur khmat bad na ki kti ki kjat lyngkhot-lyngkhai.
La ong ba kane ka rukom pynïap ka long kaba itriem shisha kumba la ïathuh da ki trai shnong. Halor kane ka jingjia na ka liang ka KSU kam lah khlem da pynpaw ka jingsngewsih bad sngewbitar ïa katei ka jingleh dusmon pyrshah ïa kane ka longkmie, bad ka pynpaw ruh ka jingsngewlem ïa kitei ki arngut ki khun, u shynrang bad ka kynthei kiba la duh noh ïa la ka kmie ha ki kti ki ‘riew thrang snam.
Na ka liang ka seng ka la maham ruh ïa kito ki briew trai shnong jong kito ki thaiñ kiba ïa khaïi pateng bad ki nong Bangladesh ba kin long kiba husiar nangne shakhmat.
Ka KSU ka la maham ba ki trai shnong kim dei ban pynjuh ïa kitei ki nong Bangladesh ban ïalam shapoh shnong poh thaw wat la ki ïadei ha kam khaïi pateng.
Shuh shuh kane ka jingjia shah pyniap jong kane ka longkmie ka la jia ha khappud ka India bad Bangladesh, kata ha ka jingjngai kaba tang kumba 2 kynta lynti na shnong Donaskur.
Ha kajuh ka por ka seng ka kyntu jur ïa ki bor pulit ban pynlong ka jingthwet ban lapdien ïa kitei ki ’riew thrang snam bad ban pynshitom tyngeh katkum ka aiñ.
