Shillong, Nailur 12
U MDC ka Mawsynram konstitwensi uba dei ruh u President ka NPP Mawsynram Block, Bah Alvin Sawkmie u la pynpaw ba um poi pyrkhat ba u MLA barim ka Mawsynram Bah Himalaya M Shangpliang uba dang shu dep ïakhun pyrshah ïa ka ilekshon MLA uba long kum u hynmen un wan kyrshan ïa u kum u para na bynta ban pynkhlaiñ ïa ka seng NPP hapoh Mawsynram konstitwensi bad hapoh ka jylla.
Ïa kine ki kyntien u Bah Alvin Sawkmie u la pynpaw haba ai jingkren ha ka jingïalang pdiang burom ïa ki nongkitkam u Bah Shangpliang kiba la rung sha ka seng NPP mynta ka Sngi Ba-ar ha seng Khasi Hall Mawsynram, Khliehshnong.
Kine nongkitkam jong u Bah Shangpliang ki dei kiba dang shu mih noh na ka seng BJP mynshem taïew.
Ha kane ka sngi palat hajar ngut ki nongkitkam u Bah Shangpliang ki la rung sha ka NPP ha kaba la pdiang burom da u Bah Alvin Sawkmie kum u President ka NPP Mawsynram Block ha ka jingïadonlang u Bah Shangpliang, ki nongkitkam ka NPP na East Khasi Hills District bad ki nongkitkam ka NPP Mawsynram Block.
Katba ïa u Bah Shangpliang, ka NPP hapoh ka jingïalam u Conrad K Sangma uba dei u President ka NPP kin sa pdiang burom lashai ka sngi ka 13 tarik Nailur, 2023 ha ka por 1:00 baje nohphai sngi ha shlem treikam ka seng ha Shillong.
Haba ai jingkren ha kane ka jingïalang u Bah Alvin Sawkmie u la ong ba um poi pyrkhat ba u Bah HM Shangpliang uba la kham slem ha ka saiñpyrthei bad uba long kum u hynmen un wan ban ïatreilang bad u ha ka seng NPP uba long tang kum u para.
U la ong kane ka jingwan pynïasoh u Bah HM Shangpliang sha ka seng NPP ka pyni ïa ka jinglong rangbah ha ka mynsiem bad ha ka pyrkhat pyrdaiñ.
Kumta u la kyntu ïa ki nongkyrshan ban long kiba kylluid mynsiem ban pynlong ïa ka seng NPP kaba khlaiñ hapoh ka Mawsynram konstitwensi.
Nalor nangta, u la ong ba ka sorkar hapoh ka jingïalam ka NPP ka la lah ban shna surok haduh 4000 kilometre ha kine ki san snem bad ka la wanrah ruh ïa ki jingïarap sha ki nongrep.
Katba na ka liang u Bah Shangpliang, u la ong ba hadien ba la rem ïa ka ilekshon MLA, ka la wan ka jingmut jingpyrkhat lada dang ïakhun baroh ar ngut kin shu shah rem bad ka jingduhnong kan long ïa ki paidbah khamtam ki nongrep bad ki nongbylla. Kumta u la shim ïa ka rai rangbah ban ïatreilang noh bad u Bah Alvin ban shakri khambha ïa ki paidbah ka konstitwensi.
