Shillong, Nailur 12
Ka jingshah weng noh u Shreyas Iyer na ka kynhun ïalehkai ka India ka ban ïakhun pyrshah ïa ka Pakistan ka lah ban pynlyng-ngoh ïa uba bun ba lang.
Une u ‘rangïalehkai dangshen u la wanphai biang sha ka kynhun ïalehkai ka ri hadien ka jingpang ha ki bynta jong ka met. Hadien kane u la shah weng na ka jingïakhun jong ka Super 4 ka ban long ha ka sngi U Blei na ka daw ka jingshitom ha ki bynta jong ka met.
Na ka liang ka Board of Control for Cricket in India (BCCI) mynta ka la pynpaw ba u Iyer un ym lah ban ïadon bynta ha ka jingïakhun pyrshah ïa ka Sri Lanka. “U Shreyas Iyer u la kham ïoh bor, hynrei um pat koit pura na ka jingshitom ha ki bynta jong ka met. La ai jingmut ïa u da ka Medical Team jong ka BCCI ba u dei ban shongthait shwa shipor bad um lah ban leit lang bad ka kynhun sha stadium mynta ka sngi na ka bynta ka jingpynkhreh ïa ka Super 4 jong ka India ka ban ïakhun pyrshah ïa ka Sri Lanka,” la ong ka kyrwoh.
U Iyer u la sdang kum u number basaw ha ka jingïakhun pyrshah ïa ka Pakistan ha ka Asia Cup.
