Shillong, Nailur 12
Ka kynhun ki ‘‘rangïalehkai phutbol kaba dang pynkhreh na ka bynta ka Asian Games ka ban sdang mynta u bnai ka lah ban pynmih da ki ‘‘rangïalehkai kiba thymmai na ka bynta katei ka lympung ka ban long ha Hangzhou.
Kat kum ka jingïalang jong ka Executive Committee (EC) ka All India Football Federation (AIFF) kaba la long ha ka janmiet jong ka Lah Sngi U Blei ka la ïakren halor ka jingleit ïashim bynta da ka kynhun ïalehkai under-23 sha ka Asian Games, hadien ba ki klob jong ka Indian Super League (ISL) ki la kyntait ban pyllait ïa ki ’’rangïalehkai ki ban mihkhmat ïa ka ri India sha katei ka lympung.
Ka Asian Games ka long shabar na ki lympung ïalehkai bar ri jong ka FIFA bad ki ‘rangïalehkai kin hap ban ïalehkai na ka bynta ki klob ha ka ISL, kaba la thmu ban sdang naduh 21 tarik mynta u bnai.
Shuh shuh ki lympung ïalehkai bar ri jong ka kynhun ïalehkai ka ri India ki dei kiba la pynbeit haduh shi snem ban pynkhreh da ka AIFF bad u coach Igor Stimac, hynrei ka Asian Games kaba la thmu ban pynlong ha u Nailur jong u snem ba la dep, la hap ban pynkynriah na ka daw jong ka khlam Covid-19 ha China, ka dei kaba khlem pynkhreh.
Te kumta ka AIFF ka la pynbiang ïa ka kynhun ki ‘rangïalehkai kiba don 22 ki ban mihkhmat sha katei ka lympung, ha kaba kan pynmih ki ‘rangïalehkai under-23 ryngkat bad lai ngut ki ‘rangïalehkai (senior).
Mynta la pynthikna ba ki lai ngut ki ‘rangïalehkai (senior) kiba kynthup ïa u kapten u Sunil Chhetri, u rangapkol u Gurpreet Singh Sandhu lem bad u rangialekai ‘dien u Sandesh Jhingan, kin ym leit lang bad ka kynhun sha Hangzhou hadien ba ki la klob jong ki, ki la kyntait ban pyllait ïa ki. Ïa kane ka rai la pyntip da ki klob sha ka AIFF, kaba la pyntip kylla sha ka Sports Authority of India (SAI).
Te mynta kane ka kynhun kan leit ïashim bynta da ki ‘rangïalehkai under-23 bad yn ym don ‘rangïalehkai (senior) hapoh katei ka kynhun kaba don 22 ngut.
Ha katei ka lympung ka India kan ïakhun nyngkong pyrshah ïa ka China ha ka 19 tarik.
