Shillong, Nailur 13
Ka lympung ïalehkai U-20 4th Division Football League 2023 ba la pynïaid da ka Shillong Sports Association ka la nangjam shaphrang ha kaba ka Kharang SC bad ka Laitumkhrah SC ki la khur jingjop ha ka sngi Balang.
Ha ka jingïakhun kaba nyngkong, ka Kharang ka la pynliem noh ïa ka Mawphlang SC lyngba ka shi kol ba la thep da u Jamshaphrang Kharsati ha ka minit kaba 26.
Haba phai sha kawei pat ka jingïakhun ba ar, ka Laitumkhrah ka la jop ïa ka Mawreng SC lyngba ka shi kol ba la thep da u Neban Lanong ha ka minit kaba 54.
Kane ka lympung kan bteng biang ha ka Sngi Palei ha kaba ka Pynthorbah SC kan ïakhun pyrshah ïa ka Lamlynti (Madanlyngkhi) FC ha ka por 3:15, katba ka Riatsamthiah SC ïa ka Mawpdang SC ha ka por 4:45 janmiet.
