Shillong, Nailur 13
Ka Saina Nehwal ka la pynpaw ba ka jingïaknieh ban ïoh rung sha ka Paris Olympics ka long kaba eh, hynrei ka jingmynsaw kan ym lah ban khanglad ïa kane ka nongïalehkai badminton jong ka ri ba kan ïehnoh ïa kane ka kam ïalehkai.
Wat hapdeng kiba bun ki jingmynsaw kynthup ïa ka khohsiew bad kiwei kiba ktah ia ka koit ka khiah, katei ka nongïa-lehkai kaba la 33 snem ka rta kaba na Hyderabad ka la ïakynduh jingeh ban long kaba khlaiñ ïalade na ka bynta ki lympung ïalehkai jong ka BWF World Tour.
Kane ka ‘thei ïalehkai kaba don mynta ha ka kyrdan ba 55 ha ka pyrthei, ka la ong ba, “Ka jingmynsaw ha ka khohsiew jong nga ka la ktah bha ïa nga ban kilanmet haduh ar kynta. Ngam lah ban pynkdor ïa ka khohsiew bad ngam lah ban bteng biang ïa ka jingkilanmet ha ka wat kaba ar. Ki doctor ki la hap ban ai da ka injek khnang ban pynduna ïa ka jingpang. Hooid ka Olympic ka la hajan bad ka long kaba eh ban ïoh rung,” la bynrap ka Saina.
“Hynrei ngan pyrshang ban ïalehkai bha khnang ba nga lah ban wanphai biang. Ki physio ki la ïarap ïa nga, hynrei ka jingshitom kam shym la hiar, kane ka lah ban shim por ba ngan koit. Ngam kwah ban pynshitom ïalade ha ka kam ïalehkai namar ka lah ban ktah ïa nga.”
“Lada nga kwah ban ïakhun pyrshah ïa ka An Seyoung, lane ka Tai Tzu Ying lane ka Akane (Yamaguchi), kan ym lah ban urlong lada nga kilanmet tang shi kynta namar ka rukom ïalehkai jong ki ka la kiew bha. Te kumta ka long kaba donkam ban pynshitom ïalade ha ka ban kilanmet khnang ban ïakhun pyr -shah ia ïkitei ki nongïaleh -kai kiba kynsai,” la bynrap ka Saina, ka ban ïoh ïa ka nam ‘Race Ambassador’ na ka bynta ka Harvest Gold Global Race ha ka 24 tarik mynta u bnai ha Gurugram.
Katei ka nongïalehkai ka la bat teng ïa ka kyrdan ba nyngkong ha ka pyrthei ka la ïalehkai khatduh ha ka Singapore Open kaba la long ha u Jylliew mynta u snem.
Ka dei ka jingïalehkai kaba khatduh ha kane ka aïom ha kaba ka la jam sha ka quarter final shisien ha u 2022, katba ka la rung semi final ha ka Orleans Masters ha u 2021.
