Hanoi, Nailur:
Ha kane ka jingjia la ong ba kumba 12 ngut ki la khlad noh na ka jingkem ding ka ïing mala hapoh ka nongbah Hanoi jong ka Vietnam ha ka Sngi Balang, ha kaba la ïohsngew ia ka jinglynñiar bad ka jinghylla jong ki paidbah kiba don hapoh katei ka iing mala.
Katei ka ding ka la sdang ban pur ha ka por shiteng miet jong ka Sngi Ba-ar bad ka la sdang naduh ka jaka set kali jong katei ka ïing 10 mala, na ka jaka ba pynieng ia ki kali ar shaka.
Ki bor pyniaid ka Vietnam ki la iathuh ba ha katei ka jingjia, ki la ioh ban pyllait im ia kumba 70 ngut ki briew bad 54 ngut pat la ioh ban pynkit noh sha ki jaka sumar bapher, kynthup ia kitei ki 12 ngut kiba khlad.
Napdeng jong kitei kiba khlad, 3 ngut ki dei ki khyllung rit.
La ong ba katei ka ïingmala ka long kaba kham jynjar ban lait mih bad ka bym don jaka tam na shawei pat ban ioh phet bad kumta kitei kiba shong hapoh kim lah ban phet shabar lait na ki jaka rung bad jaka mih ba ki dei ban iaid lyngba na katei ka ding.
Katkum ki dur ba la pyn saphriang da kito ki nongsakhi kiba iadon lang ha katei ka jingjia ha katei ka miet, la iohi ia ki thylliej ding kiba ïeng na katei ka ïingmala kaba heh ha katei ka jaka ha ryngkat ka tdem kaba rben kaba mih na katei ka jaka ba pluh.
La ong ba ki kynhun pynlip ding ki la iakhun shitom ban pynlip ia katei ka ding ha ka por kaba khyndiat hynrei ki la lah ban pynlip lut ia ka ding baroh haduh ban da kylla step syndon namar ka jaka iaid ban rung bad mih ha katei ka ïingmala ruh ka long kaba khim bad kaba jynjar bad kumta kane ka la nang pyn jynjar shuh shuh ia ki ba kin ioh ban pynlip ia katei ka ding ha ka por kaba kloi.
La ong ba ki baranda rit ‘Balconies’ jong katei ka ïingmala ruh ki dei kiba la ker sawdong da ki nar rot bad katei ka ïingmala ka dei kaba don tang kawei ka jaka rung- jaka mih.
Shuh shuh ruh la ioh jingtip ba kid on kumba 150 ngut eiei ki nongshong wai ha katei ka iing 10 mala.
Ha katei ka jingjia, ki don ruh kiba iohi ia uwei u khynnah rit uba la shah kawang na ka mala ba shajrong tang ban pyllait ia u na ka ding. Haduh mynta, ym pat lah ban tip la utei u khynnah un dang im ne em ruh namar ia kane la iohi da ki para marjan jong katei ka iing bad kiba shu kum iohi ryngkhat ha ka por ba ki ïohsngew bad iohi ia ka jingkem ding bad ka tdem kaba mih na katei ka ïingmala.
Ka Vietnam ka la ioh mad ia bun tylli ki jingjia pluh ding kiba shyrkhei wat ha kine ki snem ba la leit ruh bad kham bun sien hi ka ju jia ha ki jaka leh kmen- leh sngewbha.
Shi snem mynshwa, ka la don kawei ka jingjia pluh ding ha ka jaka leh kmen ‘Karaoke Bar’ ha ka Hub Ho Chi Minh City, ha kaba 32 ngut ki la duh noh ia ka jingim ha katei ka jingjia bad kumba 17 ngut ruh kiba mynsaw ha katei ka jingpluh.
Haba iadei bad kane, ki trai jong katei ka jaka ki la shah kem bad shah pynngat kyndon noh halor ka jingbym bud jongki ai ki kyndon bad ki rukom ban iada na ki jingjia pluh ding ha kum katei ka jaka.
Kumjuh ruh ha u snem 2018, 13 ngut ki briew ki la duh noh la ka jingim ha ka jingpluh ka ïingmala ba ki shong wai hapoh Ho Chin Minh City.
Shuh shuh ruh ha u snem 2016, 13 ngut la khlad na ka jingpluh ha kawei ka jaka leh kmen hapoh Hanoi.
