Shillong, Nailur 13
Ka Brazil ka la lah ban khur jingjop ar sien ha ka lympung ïaknieh rung World Cup 2026 (qualifying) hadien ba u Marquinhos u la ïoh ban thep kol shwa ban wai na ka bynta ban jop da 1-0 kol ia ka Peru ha ka sngi Balang ha Lima.
Ka Brazil, kaba la lah ban pynliem ïa ka Bolivia da 5-1 kol ha la ïing ha ka sngi Thohdieng, ka la kamai 6 point ryngkat bad ka Argentina na ka bynta ban jam sha ka kyrdan ba hakhlieh jong ka lympung ïaknieh na South America.
Kane ka kynhun hapoh ka jingïalam u Fernando Diniz kum u coach ba shipor, ka la lah ban ïalehkai bha naduh kaba sdang ha kaba ka la ïoh ïa ki kabu kiba biang, hynrei Raphinha bad Richarlison kim shym la lah ban pynurlong.
“Nga sngewkmen ba ngi la lah ban ïalehkai bha ha baroh ar ki jingïakhun. Kane ka jingïalehkai ka long kaba kham pher. Ka kynhun ka la dei ban thep haduh lai kol, hynrei ka la ïoh tang shi kol,” la pynpaw u Diniz ha ki lad pathai khubor.
“Ka long kaba kongsan ban khur ïa ka jingjop. Nga sngew ban ong ba ngi khur jingjop ryngkat ki jingmyntoi na ka bynta ka kynhun.”
Wat la kine ki kynhun kim shym la lah ban thep kol, hynrei shwa ban wai u rangïalehkai ‘dien ka Paris St Germain u Marquinhos u la lah ban pynurlong lyngba ka corner ba la shut da u Neymar ha ka minit kaba 90 na ka bynta ban pynlong ia ka Brazil ban khur syndon ïa ka jingjop.
